ముజఫర్‌పూర్: రైలు ప్రయాణికుల బ్యాగుల్లో ఏముందో ముందే పసిగట్టి, విలువైన వస్తువులనే టార్గెట్ చేస్తున్న ఒక వింతైన దొంగల ముఠాను పోలీసులు అరెస్ట్ చేశారు. సద్భావన ఎక్స్‌ప్రెస్‌లో ప్రయాణిస్తున్న ప్రీతి ఖేమ్కా అనే మహిళకు చెందిన రూ. 15 లక్షల విలువైన వజ్రాల ఆభరణాలు, ఐప్యాడ్, మొబైల్ దొంగతనం చేసిన కేసులో ఈ ముఠా గుట్టు రట్టయింది.
ఎక్స్-రే లెన్స్ వాడే దొంగ: ముఠా నాయకుడు ధీరజ్ సింగ్, అతని కుమారుడు అంకిత్‌లను విచారించినప్పుడు షాకింగ్ విషయాలు తెలిశాయి. తన వద్ద ఒక ప్రత్యేకమైన ‘ఎక్స్-రే లెన్స్’ ఉందని, దాని ద్వారా ప్రయాణికుల బ్యాగుల్లో ఏముందో క్షణాల్లో తెలుసుకోగలనని ధీరజ్ వెల్లడించాడు. బ్యాగులో ఉన్నది అసలు బంగారమా, వజ్రాలా లేదా నకిలీవా (Artificial) అని పరీక్షించడానికి ప్రత్యేక పనిముట్లను వెంట ఉంచుకుంటాడని పోలీసులు తెలిపారు.
కుటుంబమంతా దొంగతనం వ్యాపారంలోనే.. ధీరజ్ దొంగతనం చేసిన సొమ్మును తన భార్య, కూతురు బ్యాంక్ ఖాతాల్లోకి మళ్లించేవాడు. అతని కూతురు ఖాతాలోకి ఏకంగా రెండు లక్షల రూపాయలు బదిలీ అయినట్లు గుర్తించారు. దొంగతనం చేసిన వస్తువులను ఎక్కడ అమ్మాలి, వజ్రాలను ఎలా వేరు చేయాలి అనే బాధ్యతను అతని కొడుకు అంకిత్ చూసుకునేవాడు. ప్రస్తుతం పోలీసులు ధీరజ్ సింగ్, అతని భార్య మంజు దేవి, కొడుకు అంకిత్ మరియు ఇద్దరు నగల వ్యాపారులతో సహా మొత్తం ఆరుగురిని అరెస్ట్ చేసి జైలుకు పంపారు.
వజ్రాలను వేరు చేయలేకపోయిన నలుగురు కంసాలీలు: ప్రీతి ఖేమ్కా వద్ద దొంగిలించిన వజ్రాల హారాలు, ఉంగరాల నుండి వజ్రాలను వేరు చేయడానికి ధీరజ్ సింగ్ నలుగురు నగల వ్యాపారుల వద్దకు వెళ్లాడు. వజ్రాలను తీసే క్రమంలో అవి దెబ్బతినే అవకాశం ఉందని వారు భయపడ్డారు. ఈలోపే జీఆర్పీ (GRP) పోలీసులు రంగంలోకి దిగి వారిని పట్టుకున్నారు. అయితే అప్పటికే ఒక బ్రాస్‌లెట్‌ను కరిగించి, దానికి వచ్చిన రూ. 5 లక్షలను ఖాతాలోకి జమ చేసుకున్నారు. పోలీసులు ఆ మొత్తాన్ని సీజ్ చేశారు.
దొంగతనం జరిగిన వస్తువుల జాబితా:
- మూడు వజ్రాల ఉంగరాలు, ఒక బంగారు ఉంగరం.
- వజ్రాల నెక్లెస్ (13.98 గ్రాములు), బ్రాస్‌లెట్ (12.71 గ్రాములు).
- ఐఫోన్-16, ఐప్యాడ్, ఇయర్ పాడ్స్.
- వివిధ బ్యాంకుల డెబిట్ కార్డులు మరియు ఐడెంటిటీ కార్డులు.
పోలీసుల చర్య: రైల్వే ఎస్పీ వీణా కుమారి మాట్లాడుతూ.. నిందితుడు ధీరజ్‌ను రిమాండ్‌లోకి తీసుకుని మరిన్ని కేసుల గురించి విచారిస్తామని తెలిపారు. అంతేకాకుండా, నిందితుల ఆస్తులను కూడా జప్తు చేస్తామని వెల్లడించారు.