ముంబై: ఐపీఎల్ చరిత్రలోనే అత్యంత విజయవంతమైన జట్టుగా పేరుగాంచిన ముంబై ఇండియన్స్ (MI) ప్రస్తుతం చీకటి రోజులను ఎదుర్కొంటోంది. రోహిత్ శర్మను తప్పించి హార్దిక్ పాండ్యాకు పగ్గాలు అప్పగించిన మేనేజ్మెంట్ నిర్ణయం, ఇప్పుడు ఆ జట్టు కొంపముంచుతోంది. 2026 సీజన్లో వరుసగా నాలుగో ఓటమితో ముంబై పతనం అట్టడుగు స్థాయికి చేరుకుంది.
హార్దిక్ చేతులెత్తేసిన వేళ..
గుజరాత్ టైటాన్స్ను విజేతగా నిలిపిన హార్దిక్, ముంబైకి కూడా అద్భుత ఫలితాలు ఇస్తాడని భావించిన ఓనర్లకు ఇప్పుడు నిరాశే ఎదురవుతోంది. గురువారం పంజాబ్ కింగ్స్తో జరిగిన మ్యాచ్లో ముంబై నిర్దేశించిన 196 పరుగుల భారీ లక్ష్యాన్ని ప్రత్యర్థి జట్టు కేవలం 16.3 ఓవర్లలోనే ఛేదించి ముంబై బౌలింగ్ను చీల్చిచెండాడింది. మైదానంలో హార్దిక్ అసహనం స్పష్టంగా కనిపించింది. ప్రతి ఫోర్, సిక్స్కు అతను బౌలర్లపై ఆగ్రహం వ్యక్తం చేయడం, అయోమయానికి గురికావడం కెమెరాల్లో బంధీ అయ్యాయి.
బోరుమంటున్న బుమ్రా.. మౌనంలో రోహిత్!
ప్రపంచ అత్యుత్తమ బౌలర్గా పేరున్న జస్ప్రీత్ బుమ్రా సైతం ఈ సీజన్లో విఫలమవుతుండటం ఆశ్చర్యం కలిగిస్తోంది. ఈ సీజన్లో ఇప్పటివరకు 114 బంతులు వేసిన బుమ్రా, ఒక్క వికెట్ కూడా తీయలేకపోవడం అతని ఫామ్పై ప్రశ్నలు లేవనెత్తుతోంది. ఇక గాయం కారణంగా డగౌట్కే పరిమితమైన రోహిత్ శర్మ, జట్టు ప్రదర్శనను చూసి తలదించుకుని తీవ్ర నిరాశలో కనిపించడం అభిమానులను కలచివేస్తోంది.
మేనేజ్మెంట్ తప్పిదాలే శాపమా?
ముంబై బౌలింగ్ విభాగం పూర్తిగా కుప్పకూలింది. కేవలం బుమ్రాపైనే భారం వేయడం, ఫామ్ కోల్పోయిన దీపక్ చాహర్, ట్రెంట్ బౌల్ట్, శార్దూల్ ఠాకూర్ వంటి వారిని నమ్ముకోవడం జట్టును దెబ్బతీసింది. ముఖ్యంగా నాణ్యమైన భారతీయ స్పిన్నర్లు లేకపోవడం ముంబైకి పెద్ద మైనస్గా మారింది.
హార్దిక్ సంచలన వ్యాఖ్యలు: కఠిన నిర్ణయాలు తప్పవా?
ఓటమి అనంతరం హార్దిక్ పాండ్యా మాట్లాడుతూ.. జట్టులోని కొందరు వ్యక్తులపై కఠిన నిర్ణయాలు తీసుకోవాల్సిన సమయం ఆసన్నమైందని మేనేజ్మెంట్కు సంకేతాలిచ్చారు. “మనం ఇలాగే కొనసాగాలా లేక జట్టులో మార్పులు చేయాలా అనేది మేనేజ్మెంట్ నిర్ణయించుకోవాలి” అని ఆయన పేర్కొనడం జట్టులో అంతర్గత విభేదాలను సూచిస్తోంది.
మొత్తానికి, ఐపీఎల్ 2026లో ముంబై ఇండియన్స్ ప్రయాణం అత్యంత దారుణంగా సాగుతోంది. సూర్యకుమార్ యాదవ్, తిలక్ వర్మ వంటి స్టార్ బ్యాటర్లు కూడా పరుగులు తీయడానికి ఇబ్బంది పడుతుండటంతో, ఈ ఐదుసార్లు ఛాంపియన్ జట్టు మళ్ళీ కోలుకుంటుందా లేదా అనేది మిలియన్ డాలర్ల ప్రశ్న.