ఉత్తరప్రదేశ్‌కు చెందిన 27 ఏళ్ల మహిళ ముంబైలో అనుమానాస్పద స్థితిలో మృతి చెందడం తీవ్ర కలకలం రేపింది. భర్త, ముగ్గురు పిల్లలను వదిలి ప్రియుడితో కలిసి ముంబైకి వెళ్లిన ఆమె.. మూడు వారాలుగా కనిపించకుండా పోయింది. చివరకు బాంద్రా ప్రాంతంలోని చెత్తకుప్పలో కుళ్లిపోయిన స్థితిలో ఆమె మృతదేహం లభ్యమైంది.
ప్రియుడితో కలిసి ముంబైకి వెళ్లిన మహిళ
ఉత్తరప్రదేశ్‌లోని బిజ్నోర్ జిల్లాకు చెందిన సాధక్‌పూర్ గ్రామ నివాసి రక్షానా ఈ ఘటనలో ప్రాణాలు కోల్పోయింది. భర్త, ముగ్గురు పిల్లలను విడిచిపెట్టి మహమ్మద్ షాకిబ్ అనే వ్యక్తితో కలిసి ఆమె ముంబైకి వెళ్లినట్లు సమాచారం.
అక్కడి శాంతాక్రూజ్ ప్రాంతంలో షాకిబ్‌తో కలిసి అద్దె ఇంట్లో నివసిస్తున్నట్లు తెలిసింది. అయితే, షాకిబ్‌కు అప్పటికే వివాహమై మొదటి భార్య ఉండటంతో.. ముగ్గురూ ఒకే ఇంట్లో నివసించే సమయంలో తరచూ గొడవలు జరిగేవని కథనం పేర్కొంది.
సెప్టెంబర్ 27 నుంచి కనిపించకుండా పోయిన రక్షానా
ఈ నేపథ్యంలో షాకిబ్ మొదటి భార్య, ఆమె కుటుంబ సభ్యులు స్వగ్రామం నుంచి ముంబైకి వచ్చినట్లు సమాచారం. సెప్టెంబర్ 27 నుంచి రక్షానా కనిపించకుండా పోయింది. కుటుంబ సభ్యులు, పరిచయస్తులు ఆందోళన చెందుతున్న సమయంలో.. అక్టోబర్ 18న బాంద్రా ప్రాంతంలోని చెత్తకుప్పలో ఆమె మృతదేహం లభ్యమైంది.
ప్రియుడితో పాటు కుటుంబ సభ్యులపైనా విచారణ
ఈ ఘటనపై కేసు నమోదు చేసిన ముంబై పోలీసులు దర్యాప్తు ప్రారంభించారు. రక్షానా మృతికి గల కారణాలను తెలుసుకునేందుకు ఆమె ప్రియుడు షాకిబ్, అతడి మొదటి భార్య, ఆమె కుటుంబ సభ్యులను పోలీసులు విచారిస్తున్నట్లు సమాచారం.
పోస్టుమార్టం అనంతరం రక్షానా మృతదేహాన్ని ఆమె స్వగ్రామానికి తరలించి అంత్యక్రియలు నిర్వహించారు.
తల్లిని కోల్పోయిన ముగ్గురు పిల్లల పరిస్థితి స్థానికులను కలచివేస్తోంది. అయితే, రక్షానా హత్యకు గురైందా? ఒకవేళ హత్య జరిగితే దాని వెనుక ఎవరున్నారు? అనే విషయాలు పోలీసుల దర్యాప్తులో తేలాల్సి ఉంది.
Leave a Reply