సాంగ్లీలోని ఖణాభాగ్కు చెందిన 19 ఏళ్ల దుర్వాంక్ షేవాలే అనే యువకుడు పుణెలో ఉద్యోగం చేస్తున్నాడు. తల్లిదండ్రులకు ఒక్కడే కొడుకు కావడంతో గారాబంగా పెరిగాడు. ఉద్యోగం చేస్తూ కుటుంబాన్ని పోషించుకుంటున్న ఆ యువకుడి జీవితంలో ఒక యువతి ప్రవేశించింది. ఇద్దరి మధ్య ప్రేమ చిగురించి, పెళ్లి చేసుకోవాలని నిర్ణయించుకున్నారు. అయితే, ఆ యువతి పెళ్లి కోసం మతం మారాలనే షరతు పెట్టడంతో దుర్వాంక్ తీవ్ర మనస్తాపానికి గురయ్యాడు. తీవ్ర మానసిక వేదనలో ఉన్న దుర్వాంక్ చివరకు తన స్వగృహంలోనే ఆత్మహత్య చేసుకున్నాడు.
మతం మార్చుకోవాలనే షరతు: దుర్వాంక్ ఆత్మహత్యకు ముందు తన మొబైల్లోని ఇన్స్టాగ్రామ్ చాట్ను గమనించిన తల్లిదండ్రులకు షాకింగ్ విషయాలు తెలిశాయి. ఆ యువతి పెళ్లి చేసుకోవాలంటే మతం మారాల్సిందేనని షరతు విధించినట్లు చాట్లో ఆధారాలు లభించాయి. ఈ విషయం వల్లే తన కొడుకు గత కొన్ని రోజులుగా డిప్రెషన్లో ఉన్నాడని తల్లిదండ్రులు ఆరోపించారు.
పోలీసుల విచారణ: దుర్వాంక్ తల్లి ఫిర్యాదు మేరకు, సంబంధిత యువతి మరియు ఆమెకు సహకరించిన మరో యువకుడిపై ఆత్మహత్యకు ప్రేరేపించినట్లు (Abetment to suicide) కేసు నమోదు చేశారు. ఈ కేసులో సాక్ష్యాధారాల కోసం ఇద్దరు నిందితుల సోషల్ మీడియా డేటాను సేకరిస్తున్నామని, సైబర్ పోలీసుల నుండి ఆ సమాచారం అందగానే విచారణ వేగవంతం చేస్తామని పోలీస్ ఇన్స్పెక్టర్ అరుణ్ సుగావ్కర్ తెలిపారు.