ఫుట్‌బాల్ ప్రపంచ దిగ్గజాలైన మెస్సీ, రొనాల్డోల అద్భుతమైన ఆటతీరును మనం చూసే ఉంటాం. అయితే, వారిద్దరినీ పక్కకు నెట్టేసేలా అసోం రాష్ట్రంలో ఓ అడవి ఏనుగు మైదానంలో చూపించిన ఫుట్‌బాల్ విన్యాసాలు ప్రస్తుతం సోషల్ మీడియాలో దావానలంలా వ్యాపిస్తున్నాయి.
మైదానంలోకి హఠాత్తుగా చొరబడిన ఆ ఏనుగు, ఫుట్‌బాల్‌తో చేసిన సరదా విన్యాసాలు చూసి నెటిజన్లు ఆశ్చర్యపోతున్నారు.
అసోం రాష్ట్రంలోని గోలాఘాట్ జిల్లా నుమాలిగఢ్ పరిధిలోని బోగిధోలా ఆట మైదానంలో కొందరు పిల్లలు ఎప్పటిలాగే సరదాగా ఫుట్‌బాల్ ఆడుకుంటున్నారు. ఆ సమయంలో సమీపంలోని అడవి నుంచి దారితప్పి వచ్చిన ఒక అడవి ఏనుగు నేరుగా మైదానం మధ్యలోకి వచ్చింది. అది చూసి భయపడిన పిల్లలు, ప్రమాదాన్ని గ్రహించి వెంటనే అక్కడి నుంచి పరుగులు తీసి సురక్షిత దూరంలో నిలబడి ఏం జరుగుతుందో గమనించసాగారు. అయితే, ఆ భారీ గజరాజు పిల్లలపై దాడి చేయడానికి కానీ, ఎలాంటి నష్టం కలిగించడానికి కానీ ప్రయత్నించలేదు. బదులుగా, గ్రౌండ్‌లో పడి ఉన్న ఫుట్‌బాల్‌పై దాని దృష్టి పడింది.
పిల్లలు సురక్షితమైన దూరం నుంచి చూస్తుండగానే, ఆ భారీ ఏనుగు ఒక ప్రొఫెషనల్ ఫుట్‌బాల్ ఆటగాడిలా బంతితో ఆడటం మొదలుపెట్టింది. ఎంతో నెమ్మదిగా, అంతే నేర్పుగా తన కాలితో బంతిని తన్నుతూ అది ఆడిన తీరు అందరినీ ఆశ్చర్యానికి గురిచేసింది.
ఏనుగు చేసిన ఈ సరదా చేష్టలను, దాని ‘డ్రిబ్లింగ్’ నైపుణ్యాన్ని అక్కడున్న ఒకరు తన మొబైల్ కెమెరాలో స్పష్టంగా రికార్డ్ చేశారు. ప్రస్తుతం ఈ వీడియో ఇంటర్నెట్‌లో విపరీతంగా వైరల్ అవుతూ ప్రపంచవ్యాప్తంగా ఉన్న ఫుట్‌బాల్ అభిమానులను విశేషంగా ఆకట్టుకుంటోంది.