రాజస్థాన్‌లోని ధోల్‌పూర్‌లో వెలుగుచూసిన ఒక హత్య కేసు ప్రజలను విస్మయానికి గురిచేస్తోంది. వివాహేతర సంబంధం కారణంగా ఒక మహిళ తన మేనల్లుడితో కలిసి భర్తను అంతమొందించింది. దాదాపు 11 నెలల సుదీర్ఘ దర్యాప్తు తర్వాత పోలీసులు ఈ మిస్టరీని ఛేదించారు. భర్తను చంపిన తర్వాత ఆ మహిళ తన మేనల్లుడితో కలిసి పారిపోయి పెళ్లి కూడా చేసుకుంది.
అసలేం జరిగింది? మీడియా నివేదికల ప్రకారం, ఈ ఘటన కోత్వాలీ పోలీస్ స్టేషన్ పరిధిలోని భైంసాఖ్ గ్రామంలో జరిగింది. ఫిబ్రవరి 15, 2025న 45 ఏళ్ల శంకర్ సింగ్ లోధా అనుమానాస్పద స్థితిలో మరణించాడు. అప్పట్లో అతను అతిగా మద్యం సేవించడం వల్లే చనిపోయాడని అందరూ భావించారు. అయితే, మృతుడి అన్నయ్య రాజేష్ సింగ్ పోలీసులకు ఫిర్యాదు చేశాడు. ఫిబ్రవరి 15 సాయంత్రం శంకర్ సింగ్ తన మేనల్లుడు హరేంద్ర సింగ్‌తో కలిసి పొలానికి వెళ్లాడని, హరేంద్ర తిరిగి వచ్చాడు కానీ శంకర్ సింగ్ రాలేదని ఫిర్యాదులో పేర్కొన్నాడు. మరుసటి రోజు ఉదయం పొలంలో శంకర్ సింగ్ మృతదేహం లభ్యమైంది, పక్కనే ఒక మద్యం సీసా కూడా ఉంది.
విషం కలిపి చంపేశారు: దాదాపు 11 నెలల తర్వాత వచ్చిన విస్రా (Viscera) రిపోర్ట్ ఆధారంగా అసలు నిజం బయటపడింది. శంకర్ సింగ్ భార్య రూబీ మరియు ఆమె మేనల్లుడు హరేంద్ర సింగ్ మధ్య ప్రేమ వ్యవహారం నడుస్తోందని దర్యాప్తులో తేలింది. వీరిద్దరూ ఫోన్లో గంటల తరబడి మాట్లాడుకునేవారు. ఈ విషయం శంకర్ సింగ్‌కు తెలియడంతో ఆయన వారిని మందలించి, కలవకుండా అడ్డుకున్నాడు.
దీనిని మనసులో పెట్టుకున్న రూబీ, హరేంద్ర కలిసి శంకర్ సింగ్‌ను వదిలించుకోవాలని ప్లాన్ వేశారు. ఫిబ్రవరి 15న హరేంద్ర తన మామను పొలానికి తీసుకెళ్లి, అక్కడ అతను తాగే మద్యంలో కీటకనాశిని (Pesticide) కలిపి ఇచ్చాడు. అది తాగిన కొద్దిసేపటికే శంకర్ సింగ్ ప్రాణాలు కోల్పోయాడు.