కోల్కతా: పశ్చిమ బెంగాల్లో మొట్టమొదటి బీజేపీ ప్రభుత్వం మే 9 (శనివారం) నాడు కొలువుదీరనుంది. విశేషమేమిటంటే, ఆ రోజు విశ్వకవి రవీంద్రనాథ్ ఠాగూర్ జయంతి కావడం విశేషం. అధికార తృణమూల్ కాంగ్రెస్ (TMC)ను మట్టికరిపిస్తూ బీజేపీ ఘనవిజయం సాధించింది. తద్వారా మమతా బెనర్జీ 15 ఏళ్ల సుదీర్ఘ పాలనకు తెరపడింది.
తూర్పు భారతదేశంలో విపక్షాలకు అత్యంత బలమైన కోటగా పరిగణించబడే బెంగాల్లో, బీజేపీ ప్రభుత్వం ఏర్పాటు చేయడం ఇదే మొదటిసారి.
బెంగాల్ విజయం చారిత్రకం: ప్రధానమంత్రి మోదీ
ఈ విజయంపై స్పందించిన ప్రధానమంత్రి నరేంద్ర మోదీ, బెంగాల్ ఫలితాలను ‘చారిత్రకం’ అని అభివర్ణించారు. ఇది బెంగాల్లో ఒక కొత్త శకానికి ఆరంభమని ఆయన అన్నారు. న్యూఢిల్లీలోని బీజేపీ ప్రధాన కార్యాలయంలో పార్టీ కార్యకర్తలను ఉద్దేశించి ఆయన మాట్లాడుతూ.. ప్రజలు మార్పును కోరుకుంటున్నారని, భయం లేని భవిష్యత్తు కోసం ఈ తీర్పు ఇచ్చారని పేర్కొన్నారు.
రాబోయే కాలంలో ప్రభుత్వం ‘మార్పుపైనే తప్ప, ప్రతికారంపై కాదు’ (Change, not Revenge) దృష్టి సారించాలని మోదీ నొక్కి చెప్పారు. రాజకీయ హింసకు ముగింపు పలకాలని, అభివృద్ధి ఆధారిత రాజకీయాల వైపు మళ్లాలని ఆయన పిలుపునిచ్చారు. ఈ భారీ విజయంలో మహిళా ఓటర్లు నిర్ణయాత్మక శక్తిగా నిలిచారని, వారి మద్దతు ఎన్నికల ముఖచిత్రాన్ని మార్చడంలో కీలక పాత్ర పోషించిందని ఆయన కొనియాడారు.
పశ్చిమ బెంగాల్ ఫలితాలు దేశవ్యాప్తంగా చర్చనీయాంశమయ్యాయి. అనేక రాష్ట్రాల్లో అధికారంలో ఉన్న ప్రభుత్వాలపై ఓటర్లు వ్యతిరేకత చూపినప్పటికీ, బెంగాల్లో సుదీర్ఘకాలం ఉన్న ఒక ప్రాంతీయ శక్తి కుప్పకూలి బీజేపీ పాగా వేయడం తూర్పు భారతదేశంలో ఒక పెద్ద మైలురాయిగా నిలిచింది.