పశ్చిమ బెంగాల్లో బిజెపి మెజారిటీ సాధించడంతో ఉత్తర భారత రాష్ట్రాల్లో మరో రాష్ట్రం ఇప్పుడు కాషాయమయమైంది. ఉత్తర భారతంలోని ఐదు రాష్ట్రాలు మినహా మిగిలిన ప్రాంతం అంతా ఇప్పుడు కేసరి రంగును పులుముకుంది. లడఖ్, జమ్మూ కాశ్మీర్, హిమాచల్ ప్రదేశ్, పంజాబ్, జార్ఖండ్ మరియు దక్షిణ భారతంలోని కర్ణాటక, కేరళ, తమిళనాడు, తెలంగాణ మినహా మిగిలిన అన్ని రాష్ట్రాల్లోనూ కాషాయ పార్టీ జెండా రెపరెపలాడుతోంది.
ఇప్పుడు ఈ జాబితాలో పశ్చిమ బెంగాల్ కూడా చేరింది. బెంగాల్లో ఓట్ల లెక్కింపు కొనసాగుతుండగా, తృణమూల్ కాంగ్రెస్ నేత మమతా బెనర్జీ 15 ఏళ్ల పాలనకు తెర దించుతూ బిజెపి భారీ ఆధిక్యంతో ముందుకు సాగుతోంది. దీనితో సోమవారం పశ్చిమ బెంగాల్ వీధులన్నీ కాషాయ రంగులతో అలంకరించబడ్డాయి. బిజెపి కార్యకర్తలు లడ్డూలు పంపిణీ చేస్తూ, నినాదాలు చేస్తూ సంబరాలు జరుపుకున్నారు.
బెంగాల్ ఎన్నికల గణాంకాలు
పశ్చిమ బెంగాల్ అసెంబ్లీ ఎన్నికల మొత్తం 294 స్థానాల్లో బిజెపి ఇప్పటికే 73 స్థానాల్లో గెలిచి, 131 స్థానాల్లో ముందంజలో ఉంది. అధికార పక్షం తృణమూల్ కాంగ్రెస్ కేవలం 33 స్థానాల్లో గెలిచి, 50 స్థానాల్లో ఆధిక్యంలో ఉంది. 2021లో 216 స్థానాలు గెలుచుకున్న టీఎంసీకి ఇది కోలుకోలేని దెబ్బ. నందిగ్రామ్ మరియు భవానీపూర్ రెండింటి నుండి పోటీ చేసిన బిజెపి నేత సువేందు అధికారి, తమ పార్టీ 180 కంటే ఎక్కువ స్థానాలతో ప్రభుత్వం ఏర్పాటు చేస్తుందని ధీమా వ్యక్తం చేశారు.
చారిత్రాత్మక విజయం
పశ్చిమ బెంగాల్లో బిజెపి సాధించిన ఈ విజయం చారిత్రాత్మకమైనది. ఎందుకంటే 2006 మరియు 2011 ఎన్నికల్లో ఒక్క సీటు కూడా గెలవని బిజెపి, 2016లో కేవలం మూడు, 2021లో 77 స్థానాలను గెలుచుకుంది. ఇప్పుడు ఏకంగా అధికారాన్ని కైవసం చేసుకునే దిశగా దూసుకుపోతోంది.
కాషాయ మ్యాప్ విస్తరణ
సోషల్ మీడియా ప్లాట్ఫారమ్ ‘X’ (గతంలో ట్విట్టర్) ఖాతాలో బిజెపి ‘మోదీమయ భారత్’ మ్యాప్ను పోస్ట్ చేసింది. ఇందులో బెంగాల్ను కూడా కాషాయ రంగులో చేర్చింది. హర్యానా, ఢిల్లీ, ఉత్తరప్రదేశ్, ఉత్తరాఖండ్, రాజస్థాన్, గుజరాత్, మధ్యప్రదేశ్, మహారాష్ట్ర, గోవా, బీహార్, అస్సాం, మణిపూర్, త్రిపుర, నాగాలాండ్, మేఘాలయ, సిక్కిం, అరుణాచల్ ప్రదేశ్, ఒడిశా, ఛత్తీస్గఢ్, ఆంధ్రప్రదేశ్, పుదుచ్చేరి మరియు ఇప్పుడు పశ్చిమ బెంగాల్ కూడా బిజెపి ఏలుబడిలోకి వచ్చాయని ఆ మ్యాప్ సూచిస్తోంది.