భూమికి పైకప్పుగా పిలవబడే, 8848 మీటర్ల ఎత్తులో ఉన్న మౌంట్ ఎవరెస్ట్ శిఖరంపై జరిగిన ఒక పరిశోధన శాస్త్రవేత్తలతో పాటు సామాన్యులను కూడా విస్మయానికి గురిచేస్తోంది. ఎవరెస్ట్ పైభాగంలోని శిలలలో 450 మిలియన్ ఏళ్ల నాటి సముద్ర జీవుల శిలాజాలు (Fossils) లభ్యమైనట్లు సోషల్ మీడియాలో వార్తలు వైరల్ అవుతున్నాయి.
క్రినోయిడ్స్, ట్రైలోబైట్స్ వంటి ప్రాచీన సముద్ర జీవుల అవశేషాలు అక్కడ కనిపించాయి. ప్రపంచంలోనే అత్యంత ఎత్తైన ఈ ప్రదేశం ఒకప్పుడు ‘టెథిస్’ (Tethys) అనే ప్రాచీన మహాసముద్రం అడుగుభాగంలో ఉండేదని ఈ ఆధారాలు నిరూపిస్తున్నాయి.
శాస్త్రవేత్తలు ఏమంటున్నారు? ఎవరెస్ట్ శిఖరంపై ఉన్న శిలలను ‘క్వోమోలాంగ్మా సున్నపురాయి’ (Qomolangma Limestone) అని పిలుస్తారు. ఇవి 488-443 మిలియన్ ఏళ్ల క్రితం నాటివి. అప్పట్లో భారత్ మరియు ఆసియా ఖండాల మధ్య టెథిస్ మహాసముద్రం విస్తరించి ఉండేది.
ఇది ఎలా సాధ్యమైంది? దీనికి కారణం ‘ప్లేట్ టెక్టోనిక్స్’ (Plate Tectonics). సుమారు 225 మిలియన్ ఏళ్ల క్రితం భారతీయ ప్లేట్ ఉత్తర దిశగా ప్రయాణించి యూరేషియన్ ప్లేట్‌ను బలంగా ఢీకొట్టింది. ఈ తాకిడి వల్ల సముద్ర గర్భంలో ఉన్న భూమి పైకి నెట్టబడి హిమాలయ పర్వతాలుగా ఏర్పడింది. అందుకే సముద్ర అడుగున ఉండాల్సిన శిలాజాలు నేడు 29,000 అడుగుల ఎత్తులో కనిపిస్తున్నాయి. హిమాలయాలు ఇప్పటికీ ఏటా 5-10 మిల్లీమీటర్ల మేర పెరుగుతూనే ఉన్నాయి.