కేరళకు చెందిన ప్రముఖ రియల్ ఎస్టేట్ సంస్థ ‘హైలైట్ గ్రూప్’ (HiLITE Group) తన 30వ వార్షికోత్సవం సందర్భంగా ఉద్యోగులకు కళ్లు చెదిరే బహుమతిని ఇచ్చింది. సుమారు ₹20 కోట్ల విలువైన 47 కార్లను తన ఉద్యోగులకు అందజేసి అందరినీ ఆశ్చర్యపరిచింది.
ఈ కార్ల జాబితాలో రేంజ్ రోవర్ (Range Rover), ఆడి క్యూ-8 (Audi Q8), ల్యాండ్ రోవర్ డిఫెండర్ (Land Rover Defender) వంటి ఖరీదైన లగ్జరీ వాహనాలతో పాటు టాటా హారియర్, కియా సెల్టోస్, హ్యుందాయ్ క్రెటా, స్కోడా కైలాక్ వంటి కార్లు కూడా ఉన్నాయి.
చైర్మన్ ఏమన్నారంటే? గత మూడు దశాబ్దాలుగా కంపెనీ అభివృద్ధిలో ఉద్యోగులు అందించిన సహకారానికి గుర్తింపుగా ఈ నిర్ణయం తీసుకున్నట్లు సంస్థ తెలిపింది. హైలైట్ గ్రూప్ చైర్మన్ పి. సులేమాన్ మాట్లాడుతూ.. “మేము 30 ఏళ్లుగా కేరళలో అత్యాధునిక స్పేస్‌లను నిర్మించడంపై దృష్టి పెట్టాము. దీర్ఘకాలం నిలిచిపోయే ప్రాజెక్టులను నిర్మించడమే మా లక్ష్యం” అని పేర్కొన్నారు.
కంపెనీ నేపథ్యం:
- స్థాపన: 1996లో కేరళలోని కోజికోడ్‌లో ప్రారంభమైంది.
- రంగం: రిటైల్, కమర్షియల్, రెసిడెన్షియల్ మరియు ఐటీ ప్రాజెక్టులు.
- విజయాలు: కేరళలో మొట్టమొదటి ఆర్గనైజ్డ్ రిటైల్ స్పేస్ ‘ఫోకస్ మాల్’ను ఈ గ్రూపే నిర్మించింది. ప్రస్తుతం 10 కొత్త మాల్స్ నిర్మాణంలో ఉన్నాయి.
- ఉద్యోగులు: ప్రస్తుతం ఈ సంస్థలో సుమారు 10,000 మంది పనిచేస్తున్నారు.
2 లక్షల ఉద్యోగాల సృష్టి: 2030 నాటికి కేరళలో 50 మిలియన్ చదరపు అడుగుల విస్తీర్ణంలో ప్రాజెక్టులను చేపట్టనున్నట్లు కంపెనీ ప్రకటించింది. దీనివల్ల రాష్ట్రంలో సుమారు రెండు లక్షల కొత్త ఉద్యోగ అవకాశాలు లభిస్తాయని కంపెనీ సీఈఓ అజిల్ ముహమ్మద్ తెలిపారు. కోజికోడ్‌లో ₹5,600 కోట్ల పెట్టుబడితో ‘వరల్డ్ ట్రేడ్ సెంటర్’ ప్రాజెక్టును కూడా ఈ సంస్థ నిర్మిస్తోంది.