ప్రముఖ కన్నడ నటి, స్టార్ యాంకర్ అనూశ్రీ (Anushree) సోషల్ మీడియాలో నెటిజన్లు ఉపయోగిస్తున్న అసభ్య పదజాలంపై విరుచుకుపడ్డారు. కేవలం కర్ణాటకలోనే కాకుండా, దేశవ్యాప్తంగా నటీమణులు, సెలబ్రిటీలు ఎదుర్కొంటున్న ట్రోలింగ్ మరియు అసభ్యకర కామెంట్లను ఆమె తీవ్రంగా ఖండించారు. ఇలాంటి వారిపై ఇప్పుడు సెలబ్రిటీలంతా ఏకమై గళం విప్పుతున్నారు.
గతంలోనూ అనేక విషయాలపై ముక్కుసూటిగా మాట్లాడే అనూశ్రీ, తాజాగా ఒక ఇంటర్వ్యూలో నెటిజన్ల పైశాచికత్వాన్ని తలచుకుని కన్నీరు పెట్టుకున్నారు. తన కెరీర్ లేదా షోల గురించి విమర్శలు వస్తే స్వీకరించే ఆమె, వ్యక్తిగత దూషణలకు దిగడంపై తీవ్ర ఆవేదన వ్యక్తం చేశారు.
‘డగార్’ (Dagar) అనే పదంపై చర్చ
సాధారణంగా అనూశ్రీ ఇంటర్వ్యూలు ఇవ్వడం చాలా తక్కువ. అయితే తాజాగా ఆర్‌జే మయూర్ తన యూట్యూబ్ ఛానెల్ ‘గోల్డెన్ క్లాస్ విత్ మయూర్’ కోసం అనూశ్రీని ఇంటర్వ్యూ చేశారు. ఈ సందర్భంగా సోషల్ మీడియాలో మహిళలకు ఎదురవుతున్న వేధింపుల గురించి ఆమె మనసు విప్పి మాట్లాడారు.
ముఖ్యంగా నెటిజన్లు కామెంట్ బాక్స్‌లలో వాడుతున్న ‘డగార్’ అనే అసభ్యకర పదం గురించి ఈ ఇంటర్వ్యూలో చర్చకు వచ్చింది. ‘డగార్’ అంటే కన్నడ వాడుక భాషలో ‘నడవడిక లేనిది’ లేదా ‘వేశ్య’ అనే అర్థం వస్తుంది.
- ఈ పదాన్ని ఉచ్చరించడానికి యాంకర్ మయూర్ కూడా ఎంతో ఇబ్బంది పడ్డారు.
- అందుకు స్పందించిన అనూశ్రీ.. “ఆ పదాన్ని కేవలం అడగడానికే మీరు అంతలా ఇబ్బంది పడుతుంటే, లక్షలాది మంది ముందు మమ్మల్ని అలా పిలుస్తుంటే మాకు ఎంత బాధగా ఉంటుందో ఆలోచించండి” అంటూ కన్నీళ్లు పెట్టుకున్నారు.
సెలబ్రిటీల ఆవేదన
సెలబ్రిటీలు తమ సోషల్ మీడియా ఖాతాలను అందరికీ అందుబాటులో (Open) ఉంచుతారు. ఇదే అలుసుగా తీసుకుని కొందరు అపరిచితులు ఇష్టమొచ్చినట్లు అసభ్య కామెంట్లు పెడుతున్నారని అనూశ్రీ తన ఆక్రోశాన్ని వెళ్లగక్కారు. ఇది కేవలం తన ఒక్కరి సమస్య కాదని, ఎంతో మంది అమ్మాయిలు నిశ్శబ్దంగా ఈ వేధింపులను భరిస్తున్నారని ఆమె పేర్కొన్నారు.