కైరో: పశ్చిమ ఆసియా సంఘర్షణలో హూతీలు భాగస్వాములయ్యారు. యుద్ధం ప్రారంభమైన తర్వాత మొదటిసారిగా ఇజ్రాయెల్‌పై దాడి చేసినట్లు యెమెన్‌లోని ఇరాన్ అనుకూల హూతీ రెబల్స్ ధృవీకరించారు.
యెమెన్ నుండి హూతీల దాడి వచ్చే అవకాశం ఉందని ఇజ్రాయెల్ ముందే హెచ్చరించింది. ఇరాన్, లెబనాన్, ఇరాక్ మరియు పాలస్తీనా ప్రాంతాల్లోని మౌలిక సదుపాయాలను లక్ష్యంగా చేసుకుని ఇజ్రాయెల్ నిరంతర దాడులు చేసిన తర్వాతే.. తాము ఈ క్షిపణి దాడి చేసినట్లు హూతీలు తెలిపారు. దాడులు ఆగే వరకు తమ చర్యలు కొనసాగుతాయని ఆ సంస్థ స్పష్టం చేసింది.
ఇజ్రాయెల్‌లో మోగిన సైరన్లు
హూతీల దాడి తర్వాత దక్షిణ ఇజ్రాయెల్‌లోని బీర్షెబా మరియు దాని పరిసర ప్రాంతాల్లో ప్రమాద హెచ్చరిక సైరన్లు మోగాయి. ఇజ్రాయెల్ సైనిక స్థావరాలను లక్ష్యంగా చేసుకుని బాలిస్టిక్ క్షిపణులతో ఈ దాడి జరిగినట్లు నివేదికలు చెబుతున్నాయి. హూతీల సైనిక ప్రతినిధి బ్రిగేడియర్ జనరల్ యహ్యా సారీ ‘అల్-మసిరా’ శాటిలైట్ టెలివిజన్ ద్వారా ఈ దాడి గురించి ముందే ప్రకటించారు.
ఇజ్రాయెల్ డిఫెన్స్ ఫోర్స్ (IDF) స్పందన
మరోవైపు, హూతీలు ప్రయోగించిన ఒక క్షిపణిని తాము గాలిలోనే కూల్చివేసినట్లు ఐడీఎఫ్ (IDF) ప్రకటించింది. ఇటీవలి వరకు ఇరాన్ యుద్ధానికి దూరంగా ఉన్న హూతీలు, ఇప్పుడు నేరుగా రంగంలోకి దిగడం కలకలం రేపుతోంది. ఒకవేళ హూతీలు తమ ప్రభావం ఉన్న బాబ్ అల్-మందాబ్ జలసంధి, ఎర్ర సముద్రం మరియు సూయజ్ కాలువను మూసివేస్తే ప్రపంచం ఒక పెద్ద ఆర్థిక సంక్షోభంలోకి నెట్టబడుతుంది.