టెహ్రాన్: మధ్యప్రాచ్యంలో యుద్ధ మేఘాలు కమ్ముకున్న వేళ, ఇరాన్ తన వైఖరిని స్పష్టం చేసింది. ఇస్రాయేల్ మరియు అమెరికాతో తాము ఎలాంటి ‘యుద్ధ విరామ’ (Ceasefire) ఒప్పందాన్ని కోరలేదని ఇరాన్ తెగేసి చెప్పింది. దీని ద్వారా అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యలకు ఇరాన్ గట్టి బదులిచ్చింది.
ఫిబ్రవరి 28 నుండి ఇస్రాయేల్ మరియు అమెరికా దళాలు ఇరాన్‌పై వరుస దాడులు చేస్తున్నాయి. ఈ దాడుల్లో ఇరాన్ అత్యున్నత నాయకుడు అలీ ఖమేనీ సహా కీలక సైనిక అధికారులు మరణించినట్లు సమాచారం. దీనికి ప్రతికారంగా ఇరాన్ కూడా ఇస్రాయేల్ మరియు గల్ఫ్ దేశాల్లోని అమెరికా సైనిక స్థావరాలపై క్షిపణులు, డ్రోన్లతో దాడులు చేస్తోంది. అంతేకాకుండా, ప్రపంచ వాణిజ్యానికి అత్యంత కీలకమైన హార్ముజ్ జలసంధిని ఇరాన్ మూసివేసింది.
యుద్ధ విరామంపై ఇరాన్ స్పష్టత: ఈ పరిస్థితుల మధ్య, ఇరాన్ చర్చలకు సిద్ధంగా ఉందని, యుద్ధ విరామ ఒప్పందం కోరుకుంటోందని ట్రంప్ వ్యాఖ్యానించారు. అయితే, ఇరాన్ విదేశాంగ మంత్రి అబ్బాస్ అరాక్చీ దీనిని పూర్తిగా ఖండించారు. “శాంతి చర్చల కోసం మేము అభ్యర్థించామనేది పచ్చి అబద్ధం. అమెరికా చేస్తున్న ఈ యుద్ధం తప్పని వారు గ్రహించే వరకు మా దాడులు కొనసాగుతాయి” అని ఆయన సోషల్ మీడియా ద్వారా స్పష్టం చేశారు.
దాడుల తీవ్రత: ఇరాన్ జరిపిన డ్రోన్ దాడుల కారణంగా యూఏఈలోని దుబాయ్ అంతర్జాతీయ విమానాశ్రయంలో విమాన సేవలు తాత్కాలికంగా నిలిచిపోయాయి. అబుదాబిలో జరిగిన దాడిలో ఒకరు మరణించగా, ఫుజైరాలోని చమురు నిల్వ కేంద్రంలో అగ్నిప్రమాదం జరిగింది. మరోవైపు, సౌదీ అరేబియా 35 ఇరాన్ డ్రోన్లను, బహ్రెయిన్ 4 క్షిపణులను కూల్చివేసినట్లు ప్రకటించాయి. దీనికి ప్రతిగా ఇస్రాయేల్.. ఇరాన్ రాజధాని టెహ్రాన్ మరియు లెబనాన్ రాజధాని బీరూట్‌పై బాంబుల వర్షం కురిపించింది. శాంతికి ఇరాన్ సమ్మతించకపోవడంతో మధ్యప్రాచ్యంలో ఉద్రిక్తతలు మరింత పెరిగేలా కనిపిస్తున్నాయి.