హుబ్బళ్లి ప్రాంతంలో జరిగిన ఈ అమానుష ఘటన స్థానికంగా తీవ్ర కలకలం రేపింది. పోలీసులు తెలిపిన వివరాల ప్రకారం..
అసలేం జరిగింది?
- అపహరణ: జనవరి 9వ తేదీ రాత్రి, హుబ్బళ్లిలోని ఒక పెట్రోల్ బంక్ వద్ద నిలబడి ఉన్న 35 ఏళ్ల మహిళను ఆటోలో వచ్చిన ముగ్గురు వ్యక్తులు అపహరించారు.
- ఘాతుకం: ఆమెను సమీపంలోని అంబేద్కర్ మైదానానికి తీసుకెళ్లి, బలవంతంగా మద్యం తాగించారు. అనంతరం ముగ్గురూ కలిసి ఆమెపై సామూహిక అత్యాచారానికి పాల్పడ్డారు.
- వీడియో వైరల్: నిందితులు ఈ ఘాతుకాన్ని వీడియో తీసి సోషల్ మీడియాలో షేర్ చేశారు. ఈ వీడియో వైరల్ కావడంతో, స్థానికులు నిందితులను గుర్తించారు.
ప్రజల ఆగ్రహం – దేహశుద్ధి:
వీడియో ఆధారంగా నిందితులు తమ ప్రాంతానికి చెందిన శివానంద (29), గణేష్ (31) అని గుర్తించిన స్థానిక ప్రజలు వారిని పట్టుకున్నారు. ఆగ్రహంతో ఊగిపోయిన జనం వారికి గుండు గీసి, కరెంటు స్తంభానికి కట్టేసి చితకబాదారు. సమాచారం అందుకున్న పోలీసులు అక్కడికి చేరుకుని నిందితులను రక్షించి అదుపులోకి తీసుకున్నారు.
బాధితురాలి నేపథ్యం:
బాధితురాలు శివమొగ్గ జిల్లాకు చెందినవారు. భర్త వేధింపుల తాలలేక అతనిపై ఫిర్యాదు చేయగా, అతను జైలుకు వెళ్ళాడు. నిలువనీడ లేక ఆమె గత ఒకటిన్నర నెలల క్రితం హుబ్బళ్లికి వచ్చి దేవాలయాలు, మఠాల వద్ద ఆశ్రయం పొందుతూ జీవిస్తున్నారు.
అరెస్టుల వివరాలు:
- ప్రధాన నిందితులు: శివానంద, గణేష్‌లతో పాటు వీడియోను సోషల్ మీడియాలో షేర్ చేసిన ప్రదీప్ (28) అనే మరో యువకుడిని పోలీసులు అరెస్ట్ చేశారు.
- ప్రతి దాడి కేసు: తమను స్తంభానికి కట్టేసి కొట్టారన్న నిందితుల ఫిర్యాదు మేరకు, దాడికి పాల్పడిన నలుగురు స్థానికులను కూడా పోలీసులు అరెస్ట్ చేయడం గమనార్హం.