సర్వీసెస్‌తో జరుగుతున్న రంజీ ట్రోఫీ మ్యాచ్‌లో బెంగాల్ కెప్టెన్ అభిమన్యు ఈశ్వరన్ అనూహ్య రీతిలో రన్ అవుట్ అయ్యారు. బంతి ఇంకా ఆటలో ఉండగానే (Ball in play), ఆయన డ్రింక్స్ బ్రేక్ కోసం క్రీజు వదిలి బయటకు రావడంతో ఈ ఘటన జరిగింది.
అసలేం జరిగింది? కళ్యాణిలోని బెంగాల్ క్రికెట్ అకాడమీ మైదానంలో జరుగుతున్న ఈ మ్యాచ్‌లో ఈశ్వరన్ 81 పరుగులతో క్రీజులో ఉన్నారు. 41వ ఓవర్ చివరి బంతిని సుదీప్ ఛటర్జీ నేరుగా బౌలర్ వైపు ఆడాడు. బౌలర్ ఆదిత్య కుమార్ ఆ బంతిని ఆపే క్రమంలో అది అతని వేళ్లకు తగిలి నాన్-స్ట్రైకర్ ఎండ్‌లోని వికెట్లను తాకింది. ఆ సమయంలో ఓవర్ పూర్తయిందని, డ్రింక్స్ బ్రేక్ ఇచ్చారని పొరబడిన ఈశ్వరన్ క్రీజు వదిలి ముందుకు నడిచారు. బంతి డెడ్ కాకముందే ఆయన క్రీజు వెలుపల ఉండటంతో థర్డ్ అంపైర్ ఆయన్ను అవుట్‌గా ప్రకటించారు.
తప్పు నాదే – ఈశ్వరన్: ఈ ఘటనపై ఈశ్వరన్ క్రీడాస్ఫూర్తితో స్పందించారు. “నేను చేసిన తప్పు నాకే ఆశ్చర్యం కలిగించింది. ఇది పూర్తిగా నా తప్పే, కాబట్టి నన్ను వెనక్కి పిలవాల్సిన అవసరం లేదు” అని ఆయన స్పష్టం చేశారు. బౌలర్ బంతిని పట్టుకున్నాడని భ్రమపడి, సహజ సిద్ధంగా ముందుకు కదిలానని ఆయన వివరించారు.
బెంగాల్ కోచ్ లక్ష్మీ రతన్ శుక్లా కూడా దీనిపై స్పందిస్తూ.. ఇది కేవలం బ్యాటర్ చేసిన పొరపాటేనని, సర్వీసెస్ జట్టు అప్పీల్ చేయడంలో తప్పులేదని అన్నారు. 2011లో ఇయాన్ బెల్ అవుట్ అయిన ఘటనతో దీనికి పోలికలు ఉన్నప్పటికీ, అప్పటి పరిస్థితులు వేరని ఆయన పేర్కొన్నారు.