నటుడు విజయ్కు చెన్నైలోని పలు ప్రాంతాల్లో ఖరీదైన నివాసాలు ఉన్నాయి. తాజాగా చెన్నై సాలిగ్రామంలోని తన పాత ఇంటిని కూల్చివేసి, అక్కడ అపార్ట్మెంట్ కాంప్లెక్స్ నిర్మించాలని ఆయన నిర్ణయించుకున్నట్లు సమాచారం.
విజయ్ ఆస్తుల వివరాలు: ఇటీవల ముగిసిన అసెంబ్లీ ఎన్నికల్లో విజయ్ తన ‘తమిళగ వెట్రి కళగం’ పార్టీ తరపున 234 నియోజకవర్గాల్లో పోటీ చేసిన సంగతి తెలిసిందే. ఎన్నికల అఫిడవిట్లో ఆయన తన ఆస్తుల విలువను సుమారు ₹115 కోట్లుగా పేర్కొన్నారు. ఇందులో నివాస గృహాలతో పాటు వాణిజ్య సముదాయాలు కూడా ఉన్నాయి. ప్రస్తుతం నీలాంగరైలో నివసిస్తున్న విజయ్కు.. సాలిగ్రామం, మైలాపూర్, ఎగ్మోర్లలో ఇళ్లు, టీ నగర్లో కమర్షియల్ బిల్డింగ్లు ఉన్నాయి. వీటితో పాటు కొడైకెనాల్లోని వట్టపట్టి గ్రామంలో వ్యవసాయ భూమి కూడా ఉంది.
సాలిగ్రామం ఇంటి కూల్చివేత: సాలిగ్రామంలోని విజయ్ పాత ఇంట్లో ప్రస్తుతం ఆయన తండ్రి ఎస్.ఏ. చంద్రశేఖర్ ఆఫీసు నిర్వహిస్తున్నారు. మరో భాగంలో సంగీత దర్శకుడు విజయ్ ఆంటోనీ స్టూడియో ఉంది. కొన్ని వ్యక్తిగత కారణాల వల్ల ఈ ఇంటిని కూల్చివేసి, అక్కడ మల్టీ స్టోరీ అపార్ట్మెంట్ కట్టాలని విజయ్ భావిస్తున్నారట. ఇటీవలే అన్నా నగర్లోని తన ఇంటిని కూడా విజయ్ విక్రయించినట్లు తెలుస్తోంది.
కోర్టు విచారణ – భరణం చర్చలు: విజయ్ భార్య సంగీత ఇప్పటికే విడాకుల కోసం కోర్టును ఆశ్రయించారు. ఈ కేసు విచారణ జూన్ 15న చెంగల్పట్టు ఫ్యామిలీ కోర్టులో జరగనుంది. సంగీతకు భారీ మొత్తంలో భరణం చెల్లించాల్సి ఉండటంతోనే, విజయ్ వరుసగా తన ఆస్తులను అమ్ముతున్నారనే ప్రచారం సినీ వర్గాల్లో సాగుతోంది. ఇప్పటికే సంగీత పేరు మీద విజయ్ ₹15 కోట్ల విలువైన స్థిర, చరాస్తులను కొనుగోలు చేసినట్లు సమాచారం. అయితే, రాజీ ప్రయత్నాలు విఫలమవ్వడంతోనే కోర్టు ప్రక్రియ వేగవంతమైందని తెలుస్తోంది.