ఘజియాబాద్‌లోని విజయనగర్ పోలీస్ స్టేషన్ పరిధిలోని ఒక నివాస సొసైటీలో గణతంత్ర దినోత్సవ వేడుకల సందర్భంగా ఒక చిన్నారి పట్ల అత్యంత హేయమైన, అశ్లీల ప్రవర్తన వెలుగులోకి వచ్చింది. సొసైటీలో నిర్వహించిన ‘భూత్ బంగ్లా’ (Haunted House) నాటకంలో పాల్గొన్న ఒక బాలికపై సొసైటీ సిబ్బంది ఒకరు అఘాయిత్యానికి ఒడిగట్టాడు.
బాధిత బాలిక తల్లి ఫిర్యాదు మేరకు పోలీసులు నిందితుడిని అరెస్ట్ చేసి జైలుకు పంపారు.
ఘటన వివరాలు: విజయనగర్ ప్రాంతంలోని ఒక సొసైటీలో నివసించే మహిళ తెలిపిన వివరాల ప్రకారం.. రిపబ్లిక్ డే సందర్భంగా సొసైటీలో వివిధ సాంస్కృతిక కార్యక్రమాలు నిర్వహించారు. ఇందులో భాగంగా ఏర్పాటు చేసిన ‘భూత్ బంగ్లా’ నాటకంలో ఆమె 12 ఏళ్ల కుమార్తె మరియు కుమారుడు పాల్గొన్నారు. ఆ నాటకం జరుగుతున్న సమయంలో అక్కడ విధులు నిర్వహిస్తున్న అజిత్ కుమార్ పాశ్వాన్ అనే సిబ్బంది బాలిక పట్ల అసభ్యంగా ప్రవర్తించడమే కాకుండా, పైశాచికంగా ఆమెను గాయపరిచాడు.
కేకలు వేసినా వదలని మృగం: నిందితుడు తన కుమార్తె రహస్య భాగాలను తాకుతూ వేధిస్తుంటే, ఆ చిన్నారి భయంతో కేకలు వేసినా అతను కనికరించలేదని తల్లి ఆరోపించింది. పక్కనే ఉన్న ఆమె సోదరుడు మరియు ఇతర స్నేహితులు అడ్డుకోవడానికి ప్రయత్నించగా, వారిని నెట్టివేసి మరి ఆ దుర్మార్గుడు ఈ దారుణానికి పాల్పడ్డాడు.
ఎట్టకేలకు నిందితుడి బారి నుండి తప్పించుకున్న బాలిక, ఏడుస్తూ తన తల్లికి విషయాన్ని వివరించింది. వెంటనే తల్లి పోలీసులను ఆశ్రయించింది. ఏసీపీ రితేష్ త్రిపాఠి తెలిపిన వివరాల ప్రకారం, జనవరి 27న నిందితుడు అజిత్ కుమార్ పాశ్వాన్‌పై సంబంధిత సెక్షన్ల కింద కేసు నమోదు చేసి, అతడిని అరెస్ట్ చేశారు.