గుజరాత్‌లోని సూరత్‌లో మహాత్మా గాంధీ చిత్రం ఉన్న రూ.500 నోటును ఉపయోగించి అభ్యంతరకరంగా ఇన్‌స్టాగ్రామ్ రీల్ చేసినట్లు ఆరోపణలు ఎదుర్కొంటున్న 47 ఏళ్ల మహిళను పోలీసులు అరెస్ట్ చేశారు.
సూరత్‌లోని అదాజన్ ప్రాంతానికి చెందిన సిమ్రన్ పటేల్ ఇన్‌స్టాగ్రామ్‌లో సుమారు 10 లక్షల మంది ఫాలోవర్లు ఉన్న కంటెంట్ క్రియేటర్‌గా గుర్తింపు పొందినట్లు పోలీసులు తెలిపారు.
గాంధీ జయంతికి ఒక రోజు ముందు.. అంటే అక్టోబర్ 1న ఆమె ఈ రీల్‌ను పోస్ట్ చేసినట్లు పోలీసులు వెల్లడించారు. వీడియో సోషల్ మీడియాలో వైరల్ కావడంతో వివాదం చెలరేగింది.
పోలీసుల ప్రకారం.. ఆ రీల్‌లో సిమ్రన్ పటేల్ రూ.500 నోటుపై ఉన్న మహాత్మా గాంధీ చిత్రాన్ని చూపిస్తూ అభ్యంతరకరమైన హావభావాలు, వ్యాఖ్యలు చేసినట్లు ఆరోపణలు ఉన్నాయి. అంతేకాకుండా “హ్యాపీ బర్త్‌డే గాంధీజీ” అంటూ పాట పాడుతూ ఆ నోటును తన దుస్తుల్లో పెట్టుకున్నట్లు కూడా పోలీసులు ఆరోపించారు.
ఈ వీడియోపై సామాజిక కార్యకర్త ధర్మేశ్ కామీ సూరత్ సైబర్ క్రైమ్ విభాగంలో ఫిర్యాదు చేశారు. ఫిర్యాదు అందుకున్న పోలీసులు దర్యాప్తు ప్రారంభించారు.
సాంకేతిక ఆధారాల ద్వారా ఆ ఇన్‌స్టాగ్రామ్ ఖాతా సిమ్రన్ పటేల్‌దేనని పోలీసులు గుర్తించినట్లు సమాచారం. అనంతరం సమాచార సాంకేతిక చట్టంలోని సెక్షన్ 67 కింద కేసు నమోదు చేశారు. ఎలక్ట్రానిక్ రూపంలో అభ్యంతరకరమైన సమాచారాన్ని ప్రచురించడం లేదా ప్రసారం చేయడానికి సంబంధించిన నిబంధన ఇది.
దర్యాప్తులో భాగంగా అక్టోబర్ 4న సూరత్ సైబర్ క్రైమ్ పోలీసులు సిమ్రన్ పటేల్‌ను అరెస్ట్ చేసినట్లు తెలుస్తోంది. అరెస్ట్ అనంతరం ఆమె క్షమాపణలు కోరుతున్న వీడియోను కూడా పోలీసులు విడుదల చేసినట్లు సమాచారం.
ఈ సందర్భంగా పోలీసులు సోషల్ మీడియాలో కంటెంట్ రూపొందించే వారికి కీలక సూచనలు చేశారు. ప్రజల మనోభావాలను దెబ్బతీసేలా, వివాదాలకు దారితీసేలా పోస్టులు చేయకుండా జాగ్రత్త వహించాలని సూచించారు.
ముఖ్యంగా జాతీయ నాయకులు, మతం, ప్రజల భావోద్వేగాలకు సంబంధించిన అంశాలపై సోషల్ మీడియాలో కంటెంట్ పోస్ట్ చేసేటప్పుడు మరింత బాధ్యతగా వ్యవహరించాలని పోలీసులు హెచ్చరించారు.
ఈ కేసులో తదుపరి దర్యాప్తు కొనసాగుతోందని, వివాదాస్పద రీల్‌కు సంబంధించిన పూర్తి వివరాలను పోలీసులు పరిశీలిస్తున్నారని సమాచారం.
Leave a Reply