రెస్టారెంట్లలో దొరికే బట్టర్ నాన్ అంటే ఇష్టపడని వారుండరు. కానీ దాని ధర చూస్తేనే కొంచెం ఆలోచిస్తాం. చిన్న దోస సైజులో ఉండే ఒక్కో నాన్ ధర 60 నుండి 80 రూపాయల వరకు ఉంటుంది. అంత ధర పెట్టి కొనే బదులు ఒక బిర్యానీ తినేయొచ్చు అనిపిస్తుంది. అయినా దాని రుచి కోసం ఆశ చావక కొని తింటుంటాం. ఇకపై ఆ చింత అవసరం లేదు! మీకు నచ్చినన్ని నాన్ రొట్టెలను ఇంట్లోనే తక్కువ ఖర్చుతో తయారు చేసుకోవచ్చు. ఆ రెసిపీ ఏంటో చూసేయండి..
కావలసిన పదార్థాలు:
- మైదా పిండి – 2 కప్పులు
- ఈస్ట్ (Yeast) – 1 స్పూన్
- చక్కెర – 1 స్పూన్
- ఉప్పు – తగినంత
- నూనె – 1 స్పూన్
- వెన్న (Butter) – తగినంత
తయారీ విధానం:
- ఈస్ట్ సిద్ధం చేయడం: ముందుగా ఈస్ట్‌ను యాక్టివేట్ చేయడానికి గోరువెచ్చని నీటిలో చక్కెర కలిపి కరిగించాలి. ఆ నీటిలో ఈస్ట్ వేసి అర గంట పాటు పక్కన పెట్టాలి. అప్పుడు ఈస్ట్ పొంగి సిద్ధమవుతుంది.
- పిండి కలపడం: ఒక గిన్నెలో మైదా పిండి, ఉప్పు, సిద్ధం చేసుకున్న ఈస్ట్ మిశ్రమం మరియు కొంచెం నూనె వేసి కలపాలి. అవసరానికి తగినట్లుగా నీళ్లు పోస్తూ చపాతీ పిండిలా మెత్తగా కలుపుకోవాలి.
- నానబెట్టడం: పిండిని బాగా కలిపిన తర్వాత దానిపై కొంచెం నూనె రాసి, ఒక పాత్రతో మూసి 2 గంటల పాటు పక్కన పెట్టాలి. అప్పుడే పిండి బాగా ఉబ్బి మెత్తగా అవుతుంది.
- నాన్ చేయడం: పిండి ఉబ్బిన తర్వాత దానిని మరోసారి బాగా కలిపి, చిన్న చిన్న ఉండలుగా చేసుకోవాలి. చపాతీలాగే ఒత్తుకోవాలి కానీ, మరీ పల్చగా కాకుండా కొంచెం మందంగా ఉండేలా చూసుకోవాలి.
- కాల్చడం: పెనం వేడి అయ్యాక, ఈ నాన్ రొట్టెను వేసి రెండు వైపులా ఎర్రగా వచ్చే వరకు కాల్చాలి. చివరగా దానిపై వెన్న (Butter) రాసి తీసేయాలి.
గార్లిక్ బట్టర్ నాన్ కావాలంటే: వెన్నలో సన్నగా తరిగిన వెల్లుల్లి ముక్కలను కలిపి నాన్ మీద రాయాలి. పైన కొంచెం సన్నగా తరిగిన కొత్తిమీర చల్లితే రెస్టారెంట్ రుచితో ‘గార్లిక్ బట్టర్ నాన్’ సిద్ధం!