రోజుకు 40 మంది బాలికలు. “3,303 మంది ఆడపిల్లలు ఎక్కడ”.. బాలుర కంటే 3 రెట్లు ఎక్కువ. A,B,C గ్రేడింగ్. రాష్ట్రాన్ని కుదిపేస్తున్న కిడ్నాప్‌లు.. సరిహద్దులు దాటి గాలింపు చర్యలు..!!!!

మధ్యప్రదేశ్ రాష్ట్రంలో బాలికలు అదృశ్యమవుతున్న ఘటనలు ఆందోళనకర స్థాయిలో పెరుగుతున్నాయి.

రాష్ట్ర పోలీసు ప్రధాన కార్యాలయంలోని మహిళా విభాగం విడుదల చేసిన తాజా గణాంకాల ప్రకారం, రాష్ట్రంలో రోజుకు సగటున 40 మంది బాలికలు అదృశ్యమవుతున్నట్లు తేలింది.

2026 మొదటి ఎనిమిది నెలల్లో (జనవరి నుండి ఆగస్టు వరకు) మాత్రమే 9,760 మంది బాలికలు అదృశ్యమైనట్లు కొత్త కేసులు నమోదయ్యాయి. ఇప్పటికే పెండింగ్‌లో ఉన్న కేసులతో కలిపి, పోలీసు రికార్డుల్లో మొత్తం 12,387 కేసులు ఉన్నాయి.

రాష్ట్ర స్థాయిలో మరియు అంతర్రాష్ట్ర స్థాయిలో ప్రత్యేక బృందాలను పంపి పోలీసులు తీవ్ర గాలింపు చర్యలు చేపట్టి, 9,084 మంది బాలికలను సురక్షితంగా రక్షించారు (రికవరీ రేటు 93 శాతానికి పైగా). అయినప్పటికీ, ఇంకా 3,303 మంది బాలికల ఆచూకీ లభించలేదు. అదృశ్యమవుతున్న బాలుర సంఖ్య కంటే బాలికల సంఖ్య 3 రెట్లు ఎక్కువగా ఉండటం మరింత ఆందోళన కలిగిస్తోంది. గత 5 ఏళ్ల గణాంకాల ప్రకారం చూస్తే..

• 2021: సంవత్సరాంతానికి 2,830 మంది బాలికల కేసులు పెండింగ్‌లో ఉన్నాయి.
• 2022: ఈ సంఖ్య 2,944కి పెరిగింది.
• 2023: పెండింగ్ కేసులు 3,764కి చేరాయి.
• 2024: గరిష్టంగా 4,001 మంది బాలికలు రక్షించబడలేదు.
• 2025: పోలీసుల తీవ్ర గాలింపు డ్రైవ్ కారణంగా 14,520 మంది బాలికలను రక్షించడంతో, పెండింగ్ సంఖ్య 2,627కి తగ్గింది.
• 2026 (ఆగస్టు నాటికి): కొత్త కేసుల రాకతో పెండింగ్ సంఖ్య మళ్లీ పెరిగి ప్రస్తుతం 3,303కి చేరుకుంది.

సెప్టెంబర్ 2026 నాటికి అత్యధికంగా ప్రభావితమైన జిల్లాలు చూస్తే.. ఇండోర్ జిల్లా 772 పెండింగ్ కేసులతో జాబితాలో మొదటి స్థానంలో ఉంది. ధార్ (559), జబల్‌పూర్ (504), భోపాల్ (493), సాగర్ (439) మరియు రత్లాం (417) జిల్లాలు కూడా ఆందోళనకర స్థాయిలో ఉన్నాయి.

పరిస్థితి తీవ్రతను దృష్టిలో ఉంచుకుని, జిల్లాల పనితీరు ఆధారంగా పోలీసు ప్రధాన కార్యాలయం ‘A, B, C’ గ్రేడింగ్ విధానాన్ని అమలు చేసింది. పొరుగు రాష్ట్రాలైన రాజస్థాన్, మహారాష్ట్ర, గుజరాత్, ఢిల్లీలకు ప్రత్యేక బృందాలను పంపి గాలింపు చర్యలను ముమ్మరం చేశారు.

పేలవమైన పనితీరు కనబరిచిన (C గ్రేడ్) జిల్లాల పోలీసు సూపరింటెండెంట్లతో (ఎస్పీలు) రాష్ట్ర పోలీసు డైరెక్టర్ జనరల్ (డీజీపీ) నేరుగా సమీక్షలు నిర్వహించి వివరణ కోరుతున్నారు. అదృశ్యమైన 3,303 మంది బాలికలను రక్షించే వరకు ఈ గాలింపు చర్యలు ఆగవని పోలీసు అధికారులు హామీ ఇచ్చారు.