ప్రోటీన్ సులభంగా లభిస్తుందనే ఉద్దేశంతో యువకులు తమ ఆహారంలో గుడ్లను ఎక్కువగా చేర్చుకుంటారు. అయితే, గుడ్లు తినడం వల్ల కొలెస్ట్రాల్ పెరుగుతుందేమో, గుండెకు ముప్పేమో అన్న ఆందోళన చాలా మందిలో ఇప్పటికీ ఉంది.
ఈ విషయంపై జరిగిన భారీ పరిశోధనలు ఇప్పుడు స్పష్టమైన సమాధానాలను ఇస్తున్నాయి. ఆరోగ్యంగా ఉన్న పెద్దలు రోజుకు ఒక గుడ్డును నిరభ్యంతరంగా తినవచ్చని ఈ అధ్యయనాలు చెబుతున్నాయి. అయితే, గుండె జబ్బులు లేదా మధుమేహం (డయాబెటిస్) ఉన్నవారి విషయంలో ఈ ప్రమాద స్థాయి మారవచ్చు.
పరిశోధనలు ఏం చెబుతున్నాయి?
అమెరికా మరియు యూరప్లో దాదాపు 1.7 మిలియన్ల మందిపై 2020లో జరిగిన అధ్యయనంలో.. రోజుకు ఒక గుడ్డు తినడం వల్ల గుండె జబ్బుల ముప్పు పెరగదని తేలింది. ఆహారం ద్వారా తీసుకునే కొలెస్ట్రాల్, రక్తంలోని కొలెస్ట్రాల్పై చాలా తక్కువ ప్రభావం చూపుతుందని హార్వర్డ్ నిపుణులు మరియు మాయో క్లినిక్ వంటి సంస్థలు ధృవీకరించాయి. ఆరోగ్యకరమైన ఆహారపు అలవాట్లు ఉన్నవారు వారానికి ఏడు గుడ్ల వరకు తినవచ్చని వారు సూచిస్తున్నారు.
గుండె జబ్బులు ఉన్నవారు జాగ్రత్త!
అమెరికన్ హార్ట్ అసోసియేషన్ ప్రకారం.. గుండె జబ్బులు లేని వారు రోజుకు ఒక గుడ్డు తినవచ్చు. కొలెస్ట్రాల్ తగ్గించుకోవాలనుకునే వారు ఒక పూర్తి గుడ్డుకు బదులుగా రెండు గుడ్డు తెల్లసొన (Egg whites) తీసుకోవడం ఉత్తమం. గుడ్డు పచ్చసొనలో కొలెస్ట్రాల్ ఉంటుంది కాబట్టి, హై కొలెస్ట్రాల్ లేదా గుండె జబ్బులు ఉన్నవారు వారానికి 3 నుండి 4 గుడ్లకే పరిమితం కావాలి.
మధుమేహం ఉన్నవారికి సూచనలు:
డయాబెటిస్ ఉన్నవారు ప్రతిరోజూ గుడ్లు తింటే గుండె జబ్బుల ముప్పు పెరిగే అవకాశం ఉందని కొన్ని అధ్యయనాలు హెచ్చరిస్తున్నాయి. అందుకే కార్డియాలజిస్టులు వీరికి వారానికి 3 లేదా 4 గుడ్లు మాత్రమే సిఫార్సు చేస్తారు. అలాగే రక్తంలోని ట్రైగ్లిజరైడ్స్ స్థాయిని క్రమం తప్పకుండా పర్యవేక్షించాలి.
భారతీయుల ఆహారశైలి – జాగ్రత్తలు:
మన ఆహారంలో నెయ్యి, వెన్న, రెడ్ మీట్ మరియు బేకరీ పదార్థాలు ఎక్కువగా ఉంటాయి. వీటితో పాటు అధికంగా గుడ్లు తింటే శరీరంలో ఎల్.డి.ఎల్ (చెడు కొలెస్ట్రాల్) పెరుగుతుంది. గుడ్డు పచ్చసొనకు బదులుగా పప్పుధాన్యాలు, పెరుగు, చేపలు లేదా పనీర్ వంటివి చేర్చుకోవడం వల్ల సమతుల్య ఆహారం లభిస్తుంది.
ఎలా తింటే మంచిది?
గుడ్డును వండే విధానం కూడా ముఖ్యం. ఉడకబెట్టిన గుడ్డు (Boiled Egg), తక్కువ నూనెతో చేసిన ఆమ్లెట్ లేదా స్క్రాంబుల్డ్ ఎగ్స్ మంచి ఎంపికలు. వీటిని తృణధాన్యాలు, కూరగాయలు మరియు పండ్లతో కలిపి తీసుకోవాలి. ఉల్లిపాయలు, టమాటాలు చేర్చిన మసాలా ఆమ్లెట్ లేదా పోహా, సలాడ్లతో కలిపి ఉడికించిన గుడ్డును ఆహారంలో చేర్చుకోవచ్చు.