పోలీసులు అనగానే సామాన్యులకు భద్రత గుర్తుకు వస్తుంది, నేరస్థులు భయంతో పారిపోతారు. కానీ, రక్షణ కల్పించాల్సిన పోలీసులే నేరస్థుల కుట్రలకు బలైతే? ఛత్తీస్‌గఢ్‌లోని రాయ్‌పూర్‌లో ఒక మహిళా కానిస్టేబుల్ విషయంలో సరిగ్గా ఇదే జరిగింది. ఒక కిరాతకుడు పన్నిన వలలో చిక్కుకున్న ఆమె, ఇప్పుడు న్యాయం కోసం తన తోటి పోలీసులనే ఆశ్రయించాల్సి వచ్చింది.
ఏం జరిగింది? ఢిల్లీకి చెందిన ఒక వ్యక్తి ‘షాదీ డాట్ కామ్’ (Shaadi.com) అనే మ్యాట్రిమోనీ సైట్ ద్వారా సదరు మహిళా కానిస్టేబుల్‌కు పరిచయమయ్యాడు. పెళ్లి చేసుకుంటానని నమ్మించి ఆమెతో స్నేహం పెంచుకున్నాడు. ఆ తర్వాత రాయ్‌పూర్‌కు వచ్చి ఆమెతో సన్నిహితంగా మెలిగి, ఆమెకు తెలియకుండా కొన్ని అంతరంగిక చిత్రాలను (Private Photos) తీసుకున్నాడు.
ఆ ఫోటోలను అడ్డం పెట్టుకుని ఆమెను బ్లాక్‌మెయిల్ చేయడం ప్రారంభించాడు. ఫోటోలు వైరల్ చేస్తానని బెదిరిస్తూ గత మూడు నాలుగు నెలల్లో ఆమె నుండి సుమారు రూ. 4 లక్షలు వసూలు చేశాడు. అంతేకాకుండా ఆమెపై అత్యాచారానికి కూడా పాల్పడ్డాడు. నిందితుడి వేధింపులు భరించలేక బాధితురాలు పోలీసులకు ఫిర్యాదు చేసింది.
పోలీసుల చర్య: బాధితురాలు వితంతువు అని, ఆ విషయాన్ని ఆసరాగా చేసుకునే నిందితుడు పెళ్లి పేరుతో ఆమెను మోసం చేశాడని పోలీసులు తెలిపారు. ప్రస్తుతం నిందితుడు పరారీలో ఉన్నాడు. టిక్రాపారా పోలీసులు బిఎన్‌ఎస్ (BNS) సెక్షన్ 308, 79 కింద ఎఫ్ఐఆర్ (FIR) నమోదు చేసి, నిందితుడి కోసం గాలిస్తున్నారు.