15 ఏళ్ల అమాయక బాలికపై లైంగిక వేధింపులకు పాల్పడి, ఆమెకు తెలియకుండా వీడియోలు తీసి బ్లాక్‌మెయిల్ చేయడమే కాకుండా, నకిలీ నికాహ్ (పెళ్లి) నాటకమాడి జీవితాన్ని నాశనం చేసిన దారుణ ఘటన వెలుగులోకి వచ్చింది.
తాను కన్నబిడ్డ హక్కుల కోసం, తనకు జరిగిన అన్యాయానికి న్యాయం చేయాలని కోరుతూ ఆ బాలిక చేతిలో బిడ్డతో అధికారుల చుట్టూ తిరుగుతున్న దృశ్యం చూసేవారి హృదయాలను కలచివేస్తోంది.
బాధిత బాలికకు 15 ఏళ్లు ఉన్నప్పుడు, పరిచయమైన ఒక వ్యక్తి ఆమెతో మాయమాటలు చెప్పి దగ్గరయ్యాడు. ఆ తర్వాత ఆ బాలికను మోసపూరితంగా తీసుకెళ్లి లైంగిక దాడికి పాల్పడటమే కాకుండా, ఆ దృశ్యాలను తన సెల్‌ఫోన్‌లో రహస్యంగా రికార్డ్ చేశాడు.
ఆ వీడియోను చూపించి బెదిరిస్తూ ఆ బాలికను తన గుప్పిట్లో పెట్టుకున్న ఆ వ్యక్తి, కొన్ని నకిలీ పత్రాలను సృష్టించి నికాహ్ చేసుకున్నట్లు నాటకమాడాడు. ఇది నిజమని నమ్మిన ఆ బాలిక, అతనితో సహజీవనం చేస్తూ గర్భం దాల్చి ఒక ఆడబిడ్డకు జన్మనిచ్చింది.
బిడ్డ పుట్టిన కొద్ది రోజులకే ఆ వ్యక్తి.. బాలికను, బిడ్డను నడివీధిలో వదిలేసి పరారయ్యాడు. ఆ తర్వాతే తాను పూర్తిగా మోసపోయానని, తనకు జరిగింది నకిలీ నికాహ్ అని ఆ బాలిక గ్రహించింది.
ప్రస్తుతం తన పసిబిడ్డ హక్కుల కోసం, తన జీవితాన్ని నాశనం చేసిన వ్యక్తికి తగిన శిక్ష పడేలా చేయాలని ఆ బాలిక పోలీసులకు, జిల్లా అధికారులకు ఫిర్యాదు చేసి పోరాడుతోంది. పోక్సో (POCSO) చట్టం కింద కేసు నమోదు చేసుకున్న పోలీసులు, పరారీలో ఉన్న ఆ వ్యక్తి కోసం తీవ్రంగా గాలిస్తున్నారు.