వజ్రాల కోసం వెతకాల్సిన అవసరం లేదు. పన్నా మట్టిలోనే నిధి..! 27.29 క్యారెట్ల బరువుతో లభించిన అరుదైన వజ్రం వేలంలో రాబట్టబోయే మొత్తం ఎంత.?

మధ్యప్రదేశ్ రాష్ట్రంలోని పన్నా జిల్లాలో ఉన్న మజ్గవాన్ వజ్రాల గనిలో 27.29 క్యారెట్ల బరువున్న అత్యంత నాణ్యమైన ‘జెమ్ క్వాలిటీ’ వజ్రం లభించింది.

సెప్టెంబర్ 15న లభించిన ఈ వజ్రం, ఎన్.ఎమ్.డి.సి. (NMDC) సంస్థకు చెందిన పన్నా గని చరిత్రలోనే దొరికిన రెండవ అతిపెద్ద వజ్రంగా అధికారులు వెల్లడించారు.

సాధారణ త్రవ్వకాల పనుల్లో భాగంగా కింబర్లైట్ దాతువును ప్రాసెస్ చేస్తున్నప్పుడు ఈ వజ్రం లభించినట్లు ఎన్.ఎమ్.డి.సి. తెలిపింది. అంతకుముందు 2010 సంవత్సరంలో ఇదే గనిలో 34.37 క్యారెట్ల బరువున్న జెమ్ క్వాలిటీ వజ్రం వెలికితీశారు. ఇప్పటివరకు ఆ సంస్థకు దొరికిన అతిపెద్ద వజ్రం అదే కావడం గమనార్హం.

కొత్తగా లభించిన 27.29 క్యారెట్ల వజ్రానికి ప్రారంభ ధరగా దాదాపు ₹1 కోటి రూపాయల వరకు కనీస వేలం వేయవచ్చని అంచనా వేశారు. వజ్రం యొక్క రంగు, బరువు, స్పష్టత (క్లారిటీ), ఆకారం వంటి అంశాల ఆధారంగా తుది విలువను నిర్ధారించిన తర్వాత, వేలంలో దీని ధర ₹2 కోట్ల నుండి ₹2.5 కోట్ల వరకు పలికే అవకాశం ఉందని తెలుస్తోంది.

పన్నా ప్రాంతం ఇప్పటికే భారతదేశంలోనే ప్రముఖ వజ్రాల గని ప్రాంతంగా పేరుగాంచింది. ఎన్.ఎమ్.డి.సి.కి చెందిన మజ్గవాన్ గని దక్షిణాసియాలోనే సంపూర్ణ యంత్రీకృత వజ్రాల త్రవ్వక ప్రాజెక్టుగా ప్రత్యేకత పొందింది. ప్రస్తుతం లభించిన ఈ అరుదైన వజ్రం పన్నా నేలలోని వజ్రాల నిల్వల ప్రాధాన్యతను మరోసారి అందరి దృష్టికి తీసుకొచ్చింది.