వాట్సాప్‌లో అత్యంత ముఖ్యమైన భద్రతా ఫీచర్‌గా చెప్పుకునే ‘ఎండ్-టు-ఎండ్ ఎన్‌క్రిప్షన్’ (End-to-End Encryption) పై ఇప్పుడు నీలినీడలు కమ్ముకున్నాయి.
వినియోగదారులు పంపే సందేశాలు, ఫోటోలు, వీడియోలు మరియు కాల్‌లు కేవలం పంపేవారికి, స్వీకరించేవారికి మాత్రమే కనిపిస్తాయని వాట్సాప్ ఇప్పటివరకు చెబుతూ వస్తోంది. అయితే, ఈ విషయంలో మెటా సంస్థ తప్పుడు సమాచారాన్ని అందిస్తోందంటూ తాజాగా కోర్టులో కేసు నమోదైంది.
కీలక దేశాల నుంచి పిటిషన్
బ్లూమ్‌బెర్గ్ (Bloomberg) వార్తా సంస్థ కథనం ప్రకారం.. ఈ కేసు జనవరి 23న శాన్ ఫ్రాన్సిస్కోలోని అమెరికా జిల్లా కోర్టులో దాఖలైంది. ఇందులో ఆస్ట్రేలియా, బ్రెజిల్, భారత్, మెక్సికో మరియు దక్షిణాఫ్రికా దేశాలకు చెందిన వినియోగదారులు భాగస్వాములుగా ఉన్నారు.
బహిర్గతమైన దిగ్భ్రాంతికర నిజాలు?
ఈ దావాలో మెటా మరియు వాట్సాప్‌పై పలు సంచలన ఆరోపణలు చేశారు:
- వినియోగదారుల వ్యక్తిగత చాట్‌లను మెటా సంస్థ స్టోర్ (Store) చేస్తోందని, విశ్లేషిస్తోందని మరియు అవసరమైతే వాటిని యాక్సెస్ చేస్తోందని పేర్కొన్నారు.
- వినియోగదారుల చాట్ హిస్టరీని కంపెనీ ఉద్యోగులు కూడా చూడగలుగుతున్నారని ఆరోపించారు.
- సంస్థలోని కొందరు ‘విజిల్ బ్లోయర్స్’ (రహస్య సమాచారాన్ని బయటపెట్టేవారు) ద్వారానే ఈ వివరాలు వెలుగులోకి వచ్చినట్లు పిటిషనర్లు తెలిపారు.
ప్రస్తుతం ఈ కేసును ‘క్లాస్ యాక్షన్’ (Class Action) దావాగా (అంటే బాధితులందరి తరపున ఒకే సామూహిక కేసుగా) పరిగణించాలని పిటిషనర్లు కోర్టును ఆశ్రయించారు.