ఇద్దరు భార్యలను పెళ్లి చేసుకున్న ఒక వ్యక్తి జీవితం ఇప్పుడు కోర్టులు, స్టేషన్ల చుట్టూ తిరగాల్సిన పరిస్థితి వచ్చింది. ఉత్తరప్రదేశ్‌లోని రాంపూర్ జిల్లా, అజీమ్ నగర్ పోలీస్ స్టేషన్ పరిధిలోని ‘నగరియా అఖిల్’ గ్రామంలో ఈ ఆసక్తికర ఘటన వెలుగుచూసింది.
అసలేం జరిగింది?
నగరియా అఖిల్ గ్రామానికి చెందిన మహమ్మద్ రఫీ అనే వ్యక్తి ఇద్దరు మహిళలను వివాహం చేసుకున్నాడు. వీరిద్దరూ ఒకే ఇంట్లో నివసిస్తున్నారు. అయితే, వీరి మధ్య తరచుగా గొడవలు జరుగుతుండేవి. ఈ క్రమంలో వివాదం ముదరడంతో ఇద్దరు భార్యలు ఫిర్యాదు చేయడానికి అజీమ్ నగర్ పోలీస్ స్టేషన్‌కు చేరుకున్నారు.
పంచాయితీ ఇచ్చిన అనాలోచిత పరిష్కారం:
పోలీసుల సమక్షంలో స్థానికులు నిర్వహించిన పంచాయితీలో భార్యల సమస్యలను విన్న తర్వాత ఒక వింత ఒప్పందం కుదిర్చారు. దాని ప్రకారం:
- వారంలో మొదటి 3 రోజులు: ఒక భార్య దగ్గర భర్త ఉండాలి.
- తర్వాతి 3 రోజులు: రెండో భార్య దగ్గర ఉండాలి.
- వారంలో 1 రోజు: భర్తకు “సెలవు” (Holiday) ఇవ్వాలి. ఆ రోజు అతను ఎవరి దగ్గర ఉండాలో తన ఇష్టప్రకారం నిర్ణయించుకోవచ్చు.
మహమ్మద్ రఫీ స్పందన:
ఈ పంచాయితీ తీర్పుపై రఫీ స్పందిస్తూ.. “ఇంట్లో గొడవలు జరగడంతో వారు స్టేషన్‌కు వెళ్లారు. అక్కడ పంచాయితీ ద్వారా గొడవ సర్దుమణిగింది. ఇప్పుడు భర్తను ఇద్దరి మధ్య పంచుకున్నారు, మూడు రోజులు ఒకరితో, మరో మూడు రోజులు ఇంకొకరితో ఉంటాను” అని తెలిపాడు.