నటి మీనా 90ల కాలం నుండి ఇప్పటివరకు సినిమాల్లో రాణిస్తూనే ఉన్నారు. రజనీకాంత్, కమల్ హాసన్, అజిత్ వంటి టాప్ హీరోలతో నటించిన ఆమె, విజయ్‌తో మాత్రం జతకట్టలేదు. దీనిపై తాజాగా ఆమె క్లారిటీ ఇచ్చారు.
మీనా మాట్లాడుతూ.. “నేను విజయ్‌తో ఎందుకు నటించలేదని చాలామంది అడుగుతుంటారు. దానికి ప్రధాన కారణం కాల్‌షీట్ల సమస్యే. నేను చాలా బిజీగా ఉన్న సమయంలో విజయ్ సినిమాల్లో అవకాశాలు వచ్చాయి. అజిత్‌తో మూడు సినిమాలు చేసిన సమయంలోనే విజయ్ నుండి కూడా ఆఫర్స్ వచ్చాయి. కానీ అప్పట్లో నేను రోజుకు మూడు షిఫ్టుల్లో, వివిధ భాషల్లో నటిస్తూ ఉండటంతో డేట్స్ అడ్జస్ట్ చేయలేకపోయాను.”
“విజయ్ నటించిన ‘ప్రియముడన్’ (కౌశల్య పాత్ర) మరియు ‘ఫ్రెండ్స్’ సినిమాల్లో హీరోయిన్ అవకాశాలు మొదట నాకే వచ్చాయి. ఫ్రెండ్స్ మలయాళ వెర్షన్‌లో నేనే నటించాను, కానీ తమిళ్ వెర్షన్ కోసం 20 రోజుల కాల్‌షీట్లు అడిగారు. అప్పుడు నేను వేరే సినిమాలతో బిజీగా ఉండటం వల్ల కుదరలేదు. ఆ తర్వాత ‘షాజహాన్’ సినిమాలో ఒక పాట (సరక్కు వచ్చిరుక్కేన్) కోసం అడిగితే మొదట వద్దన్నాను. కానీ నిర్మాత చౌదరి గారు అడగటంతో ఒప్పుకున్నాను.”
“షూటింగ్ స్పాట్‌లో విజయ్ నన్ను నేరుగా అడిగారు.. ‘మీరు అజిత్‌తో మూడు సినిమాలు చేశారు, నాతో మాత్రం నటించనని చెబుతున్నారు ఎందుకు?’ అని. దానికి నేను కాల్‌షీట్ల ఇబ్బంది గురించి వివరించాను. నేను ఆయనతో నటించకపోయినా, నా కూతురు నైనిక ‘తేరి’ సినిమాలో విజయ్ కూతురిగా నటించి ఆ లోటు తీర్చేసింది” అని మీనా చెప్పుకొచ్చారు.