కన్యాకుమారి/రాజకీయం: తమిళనాడు అసెంబ్లీ ఎన్నికల సమరంలో తమిళ వెట్రి కళగం (TVK) అధినేత విజయ్ ప్రచార పర్వం ప్రకంపనలు సృష్టిస్తోంది. కన్యాకుమారి జిల్లా మహాదానపురంలో జరిగిన భారీ బహిరంగ సభలో విజయ్ తన మేనిఫెస్టోలోని అంశాలను వివరిస్తూ అధికార పక్షంపై నిప్పులు చెరిగారు. సైన్స్ మరియు టెక్నాలజీ సాయంతో తమిళనాడు రూపురేఖలను మారుస్తానని, లంచం అన్న మాటే లేకుండా పాలన సాగిస్తానని ఆయన హామీ ఇచ్చారు.
విజయ్ ప్రసంగంలోని ముఖ్యాంశాలు మరియు ఆయన ప్రకటించిన సంచలన పథకాలు ఇవే:
- తమిళనాడు సిటిజన్ ప్రివిలేజ్ కార్డ్: ప్రతి కుటుంబానికి ఆధార్ తరహాలోనే ‘సిటిజన్ ప్రివిలేజ్ కార్డ్’ అందిస్తామని విజయ్ ప్రకటించారు. “ప్రజలు పథకాల కోసం దరఖాస్తు చేసుకోవాల్సిన పని లేదు, అధికారుల చుట్టూ తిరగాల్సిన అవసరం లేదు. ఆర్టిఫిషియల్ ఇంటెలిజెన్స్ (AI) సాయంతో అర్హులైన ప్రతి ఒక్కరి ఇంటికే ప్రభుత్వ ఫలాలు నేరుగా చేరుతాయి. ఇది స్టాలిన్ గారు చెప్పే కబుర్ల లాంటిది కాదు.. శాస్త్రీయంగా సాధ్యమయ్యే ప్రణాళిక” అని ఆయన స్పష్టం చేశారు.
- సక్సెస్ తమిళనాడు సూపర్ యాప్: టీవీకే అధికారంలోకి వచ్చిన ఆరు నెలల్లోనే ‘సేవా హక్కు చట్టాన్ని’ తీసుకొస్తామని విజయ్ హామీ ఇచ్చారు. డ్రైవింగ్ లైసెన్స్, రేషన్ కార్డ్, బర్త్ సర్టిఫికేట్ వంటి సేవలన్నీ మొబైల్ యాప్‌లోనే లభిస్తాయని, సేవల్లో జాప్యం జరిగితే సంబంధిత అధికారులపై కఠిన చర్యలు తీసుకుంటామని హెచ్చరించారు.
- పాలనలో ప్రజలే భాగస్వాములు: ప్రజలు కేవలం ఓటర్లుగానే కాకుండా ప్రభుత్వ భాగస్వాములుగా ఉండాలని విజయ్ ఆకాంక్షించారు. ఇందుకోసం ‘My Victory Tamil Nadu’ వెబ్‌సైట్ ద్వారా ప్రజల సూచనలు తీసుకోవడం, బడ్జెట్ ఖర్చులను ప్రజలే పర్యవేక్షించేలా పారదర్శకతను తీసుకువస్తామన్నారు.
- డిజిటల్ అసెంబ్లీ – ప్రజల గళం: భారత చరిత్రలో తొలిసారిగా ప్రజలు నేరుగా అసెంబ్లీకి డిజిటల్ పద్ధతిలో వినతులు పంపుకునేలా ‘మక్కల్ అరంగం’ (ప్రజా వేదిక) ఏర్పాటు చేస్తామన్నారు. ఒక వినతి పత్రంపై 5 లక్షల సంతకాలు ఉంటే దానిపై అసెంబ్లీలో చర్చించడం తప్పనిసరి చేస్తామని, ఇందుకోసం సభలో ఒక రోజును ప్రత్యేకంగా కేటాయిస్తామని వెల్లడించారు.
- అప్పుల ఊబిలో తమిళనాడు: రాష్ట్ర ఆర్థిక పరిస్థితిపై విజయ్ ఆందోళన వ్యక్తం చేశారు. “తమిళనాడు అప్పులు 10.5 లక్షల కోట్లకు చేరాయి. గత 70 ఏళ్లలో లేనంత అప్పు ఈ ఐదేళ్లలోనే చేశారు. మనం చెల్లించే వడ్డీ మన బిడ్డల చదువును, ఆరోగ్యాన్ని దొంగిలించడంతో సమానం” అని విమర్శించారు. ప్రజలపై పైసా అదనపు పన్ను భారం వేయకుండా ఆదాయ మార్గాలను పెంచుతామని ఆయన ధీమా వ్యక్తం చేశారు.
తమిళనాడును భారత దేశపు ఏఐ (AI) మరియు డిజిటల్ రాజధానిగా మారుస్తానని, దేశంలోనే తొలిసారిగా ‘ఏఐ మంత్రిత్వ శాఖ’ను ఏర్పాటు చేస్తామని విజయ్ ప్రకటించడం ఇప్పుడు రాజకీయ వర్గాల్లో చర్చనీయాంశమైంది.