వారణాసి: వారణాసిలోని లాల్ బహదూర్ శాస్త్రి అంతర్జాతీయ విమానాశ్రయంలో, వాహనాలు ఉచితంగా పార్కింగ్ చేసే సమయ పరిమితి లోపు కూడా సిబ్బంది అక్రమంగా డబ్బులు వసూలు చేస్తున్నారని ఒక వైద్యుడు ఆరోపించారు.
రాహుల్ కుమార్ సింగ్ అనే వైద్యుడు, విమానాశ్రయ సిబ్బంది తన వద్ద నుండి అక్రమంగా పార్కింగ్ ఫీజు వసూలు చేయడానికి ప్రయత్నించారని పేర్కొంటూ, తన కారులోని ‘డాష్క్యామ్’ వీడియో ఆధారాలను ‘X’ (ట్విట్టర్) సోషల్ మీడియా వేదికలో పంచుకున్నారు.
విమానాశ్రయ నిబంధనల ప్రకారం, ప్రయాణికులను దించడానికి లేదా ఎక్కించుకోవడానికి వాహనాలు లోపలికి ప్రవేశించి, 7 నిమిషాల్లోపు బయటకు వస్తే ఎటువంటి రుసుము చెల్లించాల్సిన అవసరం లేదు. అయితే, డాక్టర్ రాహుల్ ఉదయం 8:46 గంటలకు విమానాశ్రయంలోకి ప్రవేశించి, 8:52 గంటలకు ఎగ్జిట్ పాయింట్కు చేరుకున్నారు (అంటే 6 నిమిషాల్లోనే). అయినా, అక్కడి సిబ్బంది ఆయనను 20 రూపాయల ఫీజు అడిగారు. దీనిపై డాక్టర్ నిలదీయగానే, ఏమాత్రం మాట్లాడకుండా ఆయనను డబ్బులు కట్టకుండానే పంపించేశారు.
“ఈ ఘటన నాకు చాలాసార్లు జరిగింది. ఇది నిజమైన రుసుము అయితే, నేను ప్రశ్నించగానే సిబ్బంది ఎందుకు వదిలేశారు?” అని డాక్టర్ రాహుల్ ప్రశ్నించారు. నిబంధనలు తెలియని ఎంతోమంది అమాయక వాహనదారుల నుండి ఇలాగే డబ్బులు వసూలు చేసి ఉంటారని ఆయన ఆందోళన వ్యక్తం చేశారు. దీనిపై ఎయిర్పోర్ట్స్ అథారిటీ ఆఫ్ ఇండియా (AAI) తక్షణమే విచారణ జరిపి, పారదర్శకమైన చర్యలు తీసుకోవాలని ఆయన కోరారు.