అమెరికా అధ్యక్షుడు డోనాల్డ్ ట్రంప్ మంగళవారం మిషిగన్‌లోని డియర్‌బార్న్‌లో ఉన్న ఫోర్డ్ ట్రక్ ప్లాంట్‌ను సందర్శించారు. ఈ సందర్భంగా ఒక ఫ్యాక్టరీ కార్మికుడు ఆయనను ఉద్దేశించి గట్టిగా ‘పెడోఫైల్ ప్రొటెక్టర్’ (పిల్లలపై లైంగిక వేధింపులకు పాల్పడేవారిని రక్షించేవాడు) అని అరవడంతో ఉద్రిక్తత చోటుచేసుకుంది.
దీనిపై ట్రంప్ వెంటనే స్పందించారు. తీవ్ర ఆగ్రహంతో కొన్ని అభ్యంతరకర పదాలు వాడుతూ, ఆ కార్మికుడికి తన మధ్యవేలు (Middle Finger) చూపించారు. ఈ మొత్తం దృశ్యం ఒక మొబైల్ వీడియోలో రికార్డ్ అయ్యి సోషల్ మీడియాలో వైరల్‌గా మారింది.
వైట్ హౌస్ వివరణ: ఈ ఘటనపై వైట్ హౌస్ కమ్యూనికేషన్స్ డైరెక్టర్ స్టీవెన్ చుంగ్ స్పందిస్తూ.. ఆ కార్మికుడు ఒక ‘పిచ్చివాడు’ అని, అతను పిచ్చిగా అరుస్తూ బూతులు తిట్టాడని పేర్కొన్నారు. “అధ్యక్షుడు దానికి తగిన రీతిలోనే స్పష్టమైన సమాధానం ఇచ్చారు” అని ఆయన సమర్థించుకున్నారు.
వివాదం వెనుక అసలు కారణం ఏమిటి? ఈ ‘పెడోఫైల్ ప్రొటెక్టర్’ అనే విమర్శకు ప్రధాన కారణం కుఖ్యాతి చెందిన జెఫ్రీ ఎప్స్టీన్ (Jeffrey Epstein) కేసు. ఎప్స్టీన్ మైనర్ బాలికల అక్రమ రవాణా కేసులో నిందితుడు. 2019లో అతను జైలులోనే మరణించాడు. గతంలో ట్రంప్‌కు ఎప్స్టీన్‌తో పరిచయం ఉండటం వల్ల, అతని కేసులకు సంబంధించిన పూర్తి ఫైళ్లను విడుదల చేయాలని అమెరికాలో డిమాండ్ పెరుగుతోంది.