ఒడిశాలోని ఖుర్దా జిల్లాలో, ప్రజలకు ఇబ్బంది కలిగిస్తున్నారన్న ఆరోపణలతో పోలీసులు ఇద్దరు యువకులను అదుపులోకి తీసుకున్నారు. వారిని సాధారణ వైద్య పరీక్షల కోసం ప్రభుత్వ ఆసుపత్రికి తీసుకెళ్లారు.
అయితే, ఆసుపత్రి ప్రాంగణంలోకి ప్రవేశించిన వెంటనే, విపరీతమైన మద్యం మత్తులో ఉన్న ఆ యువకులు పోలీసులను ఏమాత్రం గౌరవించకుండా గొడవకు దిగారు. ఒక్కసారిగా పోలీసులపై దాడికి పాల్పడ్డారు. ఈ ఊహించని దాడితో ఆసుపత్రిలోని రోగులు, సిబ్బంది భయంతో పరుగులు తీశారు. దీంతో ఆసుపత్రి ప్రాంగణంలో తీవ్ర ఉద్రిక్తత, గందరగోళం నెలకొంది.
పరిస్థితి చేయి దాటిపోవడంతో, వెంటనే ఖుర్దా టౌన్ పోలీసులకు సమాచారం అందించారు. అదనపు బలగాలు సంఘటనా స్థలానికి చేరుకున్నాయి. ఆ తర్వాత, విధ్వంసం సృష్టించిన ఆ ఇద్దరినీ పోలీసులు అదుపులోకి తీసుకుని, తమదైన శైలిలో దేహశుద్ధి చేసి తిరిగి కస్టడీలోకి తీసుకున్నారు. ప్రభుత్వ ఆసుపత్రిలోనే పోలీసులపై దాడి చేసిన ఈ ఘటనకు సంబంధించిన వీడియో సోషల్ మీడియాలో వైరల్ కావడంతో, నెటిజన్లు తీవ్ర ఆగ్రహం వ్యక్తం చేస్తున్నారు. ఈ ఘటనపై పోలీసులు లోతుగా విచారణ జరుపుతున్నారు.