భారతదేశంలోని ఫాస్ట్ డెలివరీ వ్యవస్థ ఎంతగా అభివృద్ధి చెందిందంటే, అది ఇప్పుడు ప్రజల అత్యవసర అవసరాలకు ప్రాణవాయువులా మారింది. దీనికి తాజా ఉదాహరణగా, ఢిల్లీలోని అమెరికా రాయబార కార్యాలయం (US Embassy) ముందు వీసా ఇంటర్వ్యూ కోసం వేచి చూస్తున్న ఒక యువతికి ‘బ్లింకిట్’ (Blinkit) యాప్ ఆపద్బాంధవుడిలా సహాయపడింది.
అసలేం జరిగింది? గౌరీ గుప్తా అనే ఐఐటీ గ్రాడ్యుయేట్ మరియు AI స్టార్టప్ వ్యవస్థాపకురాలు O-1 వీసా ఇంటర్వ్యూ కోసం ఢిల్లీలోని అమెరికా ఎంబసీ వద్ద క్యూలో నిలబడ్డారు. ఉదయం 8 గంటలకు ఆమె ఇంటర్వ్యూ షెడ్యూల్ చేయబడింది. అయితే లైన్‌లో నిలబడినప్పుడు, కొన్ని ముఖ్యమైన పత్రాలు (Documents) తీసుకురావడం మరిచిపోయినట్లు ఆమెకు అకస్మాత్తుగా గుర్తొచ్చింది. దగ్గరలో ఎలాంటి ప్రింటింగ్ షాపులు లేకపోవడంతో ఆమె తీవ్ర ఆందోళనకు గురయ్యారు.
సెక్యూరిటీ గార్డ్ ఇచ్చిన సలహా: గౌరీ ఆందోళనను గమనించిన అక్కడి సెక్యూరిటీ గార్డ్, బ్లింకిట్ యాప్ ద్వారా ప్రింట్ అవుట్ ఆర్డర్ చేయమని సలహా ఇచ్చారు. వెంటనే స్పందించిన గౌరీ, లైన్‌లో నిలబడే తన ఫోన్ ద్వారా పత్రాలను యాప్‌లో అప్‌లోడ్ చేశారు. ఆశ్చర్యకరంగా, కేవలం 15 నిమిషాల్లోనే బ్లింకిట్ డెలివరీ బాయ్ ఆమె అడిగిన ప్రింట్ అవుట్‌లను ఎంబసీ ముందే ఆమెకు అందజేశారు.
విజయవంతమైన వీసా ఇంటర్వ్యూ: సరిగ్గా సమయానికి పత్రాలు అందడంతో గౌరీ ఆత్మవిశ్వాసంతో ఇంటర్వ్యూ ఎదుర్కొన్నారు. ప్రస్తుతం ఆమె వీసా కూడా ఆమోదించబడింది. ఈ విషయాన్ని ఆమె ఎక్స్ (ట్విట్టర్) వేదికగా పంచుకుంటూ, “భారతదేశంలో ఇలాంటి సేవలు అందుబాటులో ఉండటం నిజంగా అదృష్టం. బ్లింకిట్ నా వీసా ఇంటర్వ్యూను కాపాడింది” అని రాశారు.
ఈ పోస్ట్ ప్రస్తుతం సోషల్ మీడియాలో వైరల్ అవుతోంది. అమెరికా వంటి దేశాల్లో కూడా ఇంత వేగవంతమైన సేవలు అందుబాటులో లేవని నెటిజన్లు కామెంట్ చేస్తున్నారు.