వైరల్ డెస్క్: స్మార్ట్‌ఫోన్.. ఇప్పుడు ఇదొక మాయా ప్రపంచం. ఒకప్పుడు వినోద సాధనంగా ఉన్న మొబైల్, ఇప్పుడు ప్రాణాంతకమైన వ్యసనంగా మారిపోయింది. వయసుతో సంబంధం లేకుండా అందరినీ తన బానిసలుగా మార్చుకుంటున్న ఈ ‘డిజిటల్ డ్రగ్’ చిన్నారుల జీవితాలను ఎంతలా ఛిన్నాభిన్నం చేస్తోందో చెప్పడానికి ఒక తాజా వీడియో నిదర్శనంగా నిలుస్తోంది. సోషల్ మీడియాలో వైరల్ అవుతున్న ఈ వీడియో చూసి నెటిజన్లు ఒక్కసారిగా హడలెత్తిపోతున్నారు.
ఏమిటా వీడియో? ఏమా ఘోరం?
వైరల్ అవుతున్న వీడియోలో ఒక పసికందు గాఢ నిద్రలో ఉంది. కానీ, ఆశ్చర్యకరంగా.. ఆ చిన్నారి చేతి వేళ్లు మాత్రం నిద్రలో కూడా మొబైల్ స్క్రీన్‌ను ‘స్క్రోల్’ (Scroll) చేస్తున్నట్టుగా కదులుతున్నాయి. బహుశా ఆ బిడ్డ మొబైల్ చూస్తూనే నిద్రలోకి జారుకుని ఉండవచ్చు. స్పృహలో లేకపోయినా, ఆ చిన్నారి మెదడు మాత్రం ఇంకా ఆ మొబైల్ లోకంలోనే ఉందన్న విషయం ఆ వేళ్ల కదలికలను చూస్తే స్పష్టమవుతోంది. ఇది చూస్తుంటే చిన్నారి మెదడుపై మొబైల్ ప్రభావం ఎంతలా ఉందో అర్థం చేసుకోవచ్చు.
నిప్పులు చెరుగుతున్న నెటిజన్లు.. తల్లిదండ్రులదే బాధ్యత!
ఈ వీడియోపై సోషల్ మీడియాలో పెద్ద ఎత్తున చర్చ నడుస్తోంది. నెటిజన్లు తమ ఆవేదనను, ఆగ్రహాన్ని కామెంట్ల రూపంలో వ్యక్తం చేస్తున్నారు:
- కన్నవారే కారణం: “పిల్లలు ఈ స్థితికి చేరుకోవడానికి తల్లిదండ్రులే ప్రత్యక్ష కారణం. బిజీ లైఫ్ పేరుతో పిల్లలకు సమయం కేటాయించలేక, వారు అల్లరి చేయకుండా ఉండటం కోసం చేతికి మొబైల్ ఇస్తున్నారు. అదే ఇప్పుడు వారి పాలిట శాపంగా మారుతోంది” అని పలువురు మండిపడుతున్నారు.
- మెదడుపై తీవ్ర ప్రభావం: పసిపిల్లల మెదడు ఎదుగుతున్న సమయంలో ఇలా గంటల తరబడి మొబైల్ స్క్రీన్‌లకు అతుక్కుపోవడం వల్ల వారి ఆలోచనా శక్తి నశిస్తుందని, ఇది భవిష్యత్తులో తీవ్రమైన మానసిక ఆరోగ్య సమస్యలకు దారితీస్తుందని వైద్య నిపుణులు హెచ్చరిస్తున్నారు.
డిజిటల్ యుగంలో పెను ముప్పు!
కేవలం రీల్స్, షార్ట్ వీడియోల మోజులో పడి లోకాన్నే మర్చిపోతున్న నేటి తరానికి ఈ వీడియో ఒక హెచ్చరిక లాంటిది. ఫోన్ లేకపోతే ఒక్క క్షణం కూడా ఉండలేని స్థితికి పిల్లలు చేరుకోవడం ఆందోళనకరం. ఈ డిజిటల్ యుగంలో పిల్లలను ఎలా పెంచాలి? వారిని ఈ మొబైల్ వ్యసనం నుండి ఎలా కాపాడుకోవాలి? అన్న అంశంపై ఇప్పుడు ప్రతి ఇంట్లోనూ లోతైన చర్చ జరగాల్సిన అవసరం ఉంది.
ప్రియమైన తల్లిదండ్రులారా.. మీ పిల్లలకు స్మార్ట్‌ఫోన్ ఇచ్చే ముందు ఒక్కసారి ఆలోచించండి.. మీరు వారికి ఇస్తుంది ఆట వస్తువునా? లేక వారి భవిష్యత్తును బుూడిద చేసే మత్తుమందునా?