వివాహం అనేది జీవితంలో ఒక ముఖ్యమైన ఘట్టం. అది అన్ని విధాలా పరిపూర్ణంగా ఉండాలనే ఆశతో చాలా మంది అప్పులు చేసి మరీ ఆడంబరంగా పెళ్లి చేసుకుంటారు. ఈ రోజుల్లో ‘వెడ్డింగ్ లోన్స్’ కూడా సర్వసాధారణం అయిపోయాయి. అయితే పెళ్లయి ఏళ్లు గడుస్తున్నా, ఆ సంతోషం కంటే తీరని అప్పులే ఆ దంపతులను ఎక్కువగా వేధిస్తుంటాయి.
కానీ ఇక్కడ ఒక జంట మాత్రం ఒక్క రోజు వేడుక కోసం లక్షల రూపాయలు ఖర్చు చేసే బదులు, ఆ డబ్బుతో తమ జీవితాంతం ఆసరాగా ఉండే ఒక ఇంటిని కొనుగోలు చేశారు. ఆ కొత్త ఇంట్లోనే అత్యంత సరళంగా వివాహం చేసుకున్నారు.
@ArnazHathiram అనే ఎక్స్ (ట్విట్టర్) ఖాతాలో ఈ విలక్షణమైన పెళ్లి గురించి సమాచారం పంచుకోగా, ప్రస్తుతం ఈ పోస్ట్ నెట్టింట వైరల్ అవుతోంది. అతిథుల కోసం భారీగా ఖర్చు చేయకుండా, తమకు ఇష్టమైన వారి సమక్షంలో ఈ వేడుకను జరుపుకున్నారు. ప్రదర్శన కోసం కాకుండా, భవిష్యత్తు భద్రత కోసం పెట్టుబడి పెట్టడం ఉత్తమమని ఈ జంట నిరూపించారు. వీరి నిర్ణయాన్ని చూసి నెటిజన్లు ప్రశంసల వర్షం కురిపిస్తున్నారు.