ప్రపంచవ్యాప్తంగా వివిధ ప్రాంతాలలో అనేక వింతలు, అతీంద్రియ సంఘటనలు నిరంతరం జరుగుతూనే ఉన్నాయి. ఇలాంటి వింతలను కొందరు దైవ లీలలుగా, మరికొందరు అతీంద్రియ శక్తులుగా భావిస్తే, ఇంకొందరు ఇవి కేవలం శాస్త్రీయ పరిణామాలు అని కొట్టిపారేస్తుంటారు.
ఆ క్రమంలో, ఇటీవల ఇండోనేషియాలో జరిగిన ఒక సంఘటన అందరినీ ఆశ్చర్యానికి, భయాందోళనకు గురిచేసింది. ఇండోనేషియాలోని పశ్చిమ సుమత్రా ప్రాంతంలో ఉన్న లిమాపులు కోటా రీజెన్సీ అనే చిన్న గ్రామంలో ప్రకృతి ఒక వింత విన్యాసం చేసింది. అక్కడ ఒక రైతుకు చెందిన వ్యవసాయ భూమి అకస్మాత్తుగా కుంగిపోయి, బావి ఆకారంలో ఒక పెద్ద గుంత ఏర్పడింది. దీనిని చూసి షాక్‌కు గురైన రైతు వెంటనే గ్రామస్తులకు సమాచారం అందించాడు.
భక్తితో తాగిన ప్రజలు
ఆ గుంత వద్దకు చేరుకున్న ప్రజలు, అందులో ఊరిన నీటిని చూసి అది ఒక అద్భుత తీర్థమని, దేవుడు సృష్టించిన ఔషధ జలం అని నమ్మడం ప్రారంభించారు. ఆ నీటిని తాగితే దీర్ఘకాలిక వ్యాధులు నయమవుతాయని, జీవితంలో శుభం కలుగుతుందని భావించి, పోటీ పడి మరీ ఆ నీటిని తాగారు.
ఈ వార్త దావానలంలా వ్యాపించడంతో, ప్రజలు తండోపతండాలుగా తరలివచ్చి బాటిళ్లలో, బిందెల్లో ఆ నీటిని నింపుకుని వెళ్లడం ప్రారంభించారు. దీనికి సంబంధించిన దృశ్యాలు సోషల్ మీడియాలో విపరీతంగా వైరల్ అయ్యాయి.
పరిశోధనల్లో బయటపడ్డ అసలు నిజం
ఈ విషయం అధికారులకు చేరడంతో, పరిశోధకులు అక్కడికి చేరుకుని ఆ నీటి నమూనాలను సేకరించి ప్రయోగశాలకు పంపారు. పరీక్షల అనంతరం వెలువడిన ఫలితాలు ప్రజలను భయపెట్టాయి. ఆ నీటిలో ఈ-కోలి (E. coli) అనే ప్రమాదకరమైన బ్యాక్టీరియా అధిక స్థాయిలో ఉన్నట్లు శాస్త్రవేత్తలు గుర్తించారు.
పశ్చిమ సుమత్రా డిప్యూటీ గవర్నర్ వాస్కో రుసిమి మాట్లాడుతూ:
“కొత్తగా ఏర్పడిన ఆ గుంతలోని నీటిలో విషపూరితమైన ఈ-కోలి బ్యాక్టీరియా చాలా ఎక్కువగా ఉంది. ఇది పేగు సంబంధిత వ్యాధులకు దారితీస్తుంది. కాబట్టి ప్రజలెవరూ ఆ నీటిని తాగవద్దు.” అని హెచ్చరించారు.
ఎందుకీ గుంత ఏర్పడింది?
భారీ వర్షాల కారణంగా సంభవించిన కొండచరియలు విరగడం, నేల కోతకు గురికావడం లేదా భూగర్భ నిర్మాణంలో బలహీనత వల్ల ఈ గుంత ఏర్పడి ఉండవచ్చని నిపుణులు భావిస్తున్నారు. ఆ నీరు చూడటానికి స్పష్టంగా ఉన్నప్పటికీ, చుట్టుపక్కల నేల నుండి బ్యాక్టీరియా మరియు జంతువుల వ్యర్థాలు అందులో కలిసే అవకాశం ఉన్నందున, అది ప్రజారోగ్యానికి అత్యంత ప్రమాదకరమని అధికారులు స్పష్టం చేశారు.