న్యూఢిల్లీ: సూపర్-8 దశలో తమ జట్టు అద్భుతమైన ప్రదర్శన చేయగలదని, తాము మొదటి మ్యాచ్‌లోనే విజయం సాధిస్తామని జింబాబ్వే కెప్టెన్ సికందర్ రజా ధీమా వ్యక్తం చేశారు. శ్రీలంకపై 6 వికెట్ల తేడాతో ఘనవిజయం సాధించిన తర్వాత రజా ఈ వ్యాఖ్యలు చేశారు.
తమ జట్టు ఆడుతున్న తీరు చూస్తుంటే, సూపర్-8లో వెస్టిండీస్‌తో జరిగే తమ మొదటి మ్యాచ్‌లో వారిని ఓడించగలమని ఆయన నమ్ముతున్నారు. జింబాబ్వే జట్టు సూపర్-8లో భారత్ ఉన్న గ్రూపులోనే ఉండటం గమనార్హం.
గురువారం కొలంబోలో శ్రీలంకతో జరిగిన మ్యాచ్‌లో జింబాబ్వే 6 వికెట్ల తేడాతో గెలుపొందింది. ఈ విజయంతో ఒక్క మ్యాచ్ కూడా ఓడిపోకుండా జింబాబ్వే సూపర్-8కు అర్హత సాధించింది. అంతకుముందు ఆస్ట్రేలియాను ఓడించి సంచలనం సృష్టించిన రజా సేన, ఇప్పుడు ఆతిథ్య శ్రీలంకను కూడా మట్టికరిపించి మిగిలిన జట్లకు గట్టి హెచ్చరికలు జారీ చేసింది.
సూపర్-8పై సికందర్ రజా వ్యాఖ్యలు:
మ్యాచ్ అనంతరం రజా మాట్లాడుతూ.. “సూపర్-8కు చేరుకున్న తర్వాత పరిస్థితులు ఇంకా మెరుగ్గా మారవచ్చు. మేము మొదటి మ్యాచ్ గెలవగలమని నమ్ముతున్నాను. గత రెండు వారాలుగా మా జట్టు చేసిన కష్టాన్ని ఎవరూ ఊహించలేదు. మేము ప్రజల మనసులను గెలుచుకోవడమే కాకుండా, వారి గౌరవాన్ని కూడా పొందుతున్నాము” అని అన్నారు.
స్పిన్నర్లపై వ్యూహం:
శ్రీలంక స్పిన్నర్లను ఎదుర్కోవడంపై తన వ్యూహాన్ని రజా వివరిస్తూ.. “ఫింగర్ స్పిన్ వ్యూహాలు పెద్దగా ఫలించడం లేదని, రిస్ట్ స్పిన్నర్లకు కొంచెం టర్న్ లభిస్తోందని గుర్తించాం. అందుకే వారి స్పిన్నర్లపై ఒత్తిడి తీసుకురావాలని నిర్ణయించుకున్నాం. శ్రీలంక బ్యాటర్లు ఆరంభించిన తీరు చూస్తే మరో 10 పరుగులు ఎక్కువ చేసేవారే, కానీ మా బౌలర్లు అద్భుతంగా కట్టడి చేశారు. ఇప్పుడు మేము సూపర్-8 కోసం భారత్ వెళ్తున్నాం. అక్కడ మాకు ఒక రోజు ప్రాక్టీస్ సమయం ఉంటుంది. మూడు మ్యాచ్‌ల్లో రెండు గెలిస్తే సెమీస్ రేసులో ఏం జరుగుతుందో చూద్దాం” అని ధీమా వ్యక్తం చేశారు.