మధ్యప్రదేశ్లోని కట్నీ జిల్లాకు చెందిన ఒక వీడియో సోషల్ మీడియాలో వైరల్ కావడంతో కలకలం రేగింది. గాయపడిన ఒక రోగి భార్యతో ‘108’ అంబులెన్స్ను కడిగిస్తున్న దృశ్యాలు ఈ వీడియోలో కనిపించాయి. దీనిపై జిల్లా యంత్రాంగం వెంటనే స్పందించి చర్యలు చేపట్టింది.
ఈ ఘటనపై విచారణ అనంతరం, సదరు ఎమర్జెన్సీ మెడికల్ టెక్నీషియన్ (EMT) మరియు అంబులెన్స్ డ్రైవర్ను ఉద్యోగం నుండి తొలగించారు.
అసలేం జరిగింది? కరేలా గ్రామంలో జరిగిన కారు ప్రమాదంలో రాహుల్ బర్మన్ అనే వ్యక్తి తీవ్రంగా గాయపడ్డాడు. అతడిని చికిత్స కోసం ‘108’ అంబులెన్స్లో కట్నీ జిల్లా ఆసుపత్రికి తరలించారు. ఆ సమయంలో రోగికి తగిలిన గాయాల వల్ల అంబులెన్స్ అంతా రక్తంతో తడిసిపోయింది. ఆసుపత్రికి చేరుకున్నాక, విధుల్లో ఉన్న ఈఎమ్టీ మోహిత్ ఖటిక్.. రోగి భార్య ప్రమీలా బర్మన్ను అంబులెన్స్ను శుభ్రం చేయమని కోరాడు. ఆ తర్వాత ఆమెతో బలవంతంగా వాహనాన్ని కడిగించారు.
కలెక్టర్ ఆదేశాలతో విచారణ: కట్నీ చీఫ్ మెడికల్ అండ్ హెల్త్ ఆఫీసర్ రాజ్ సింగ్ ఠాకూర్ ఈ ఘటనపై విచారణ జరిపారు. ఈ చర్య అత్యంత అనుచితమని మరియు వైద్య వ్యవస్థలోని నిబంధనలకు విరుద్ధమని ఆయన పేర్కొన్నారు. ఈ వీడియో తీవ్ర చర్చకు దారితీయడంతో, జిల్లా కలెక్టర్ ఆశిష్ తివారీ సమగ్ర విచారణకు ఆదేశించారు.
విచారణ నివేదిక ఆధారంగా, అంబులెన్స్ సేవలను నిర్వహిస్తున్న జేఏఈఎస్ (JAES) ప్రాజెక్ట్స్ ప్రైవేట్ లిమిటెడ్ సంస్థ.. అంబులెన్స్ పైలట్ దేవా సాహు మరియు ఈఎమ్టీ మోహిత్ ఖటిక్లను విధుల్లోంచి తొలగించింది. బాధ్యతాయుతమైన సేవలు అందించడంలో విఫలమైనందున మరియు ఇలాంటి ఘటనలు పునరావృతం కాకుండా ఉండటానికే ఈ నిర్ణయం తీసుకున్నట్లు అధికారులు తెలిపారు.