పశ్చిమాసియాలో పెరుగుతున్న ఉద్రిక్తతల వల్ల ముడి చమురు ధరలు పెరగడం భారతీయ మార్కెట్పై తీవ్ర ప్రభావం చూపింది. ఆసియా మార్కెట్ల నుండి వచ్చిన మిశ్రమ సంకేతాలు కూడా దేశీయ మార్కెట్ బలహీనపడటానికి కారణమయ్యాయి.
ట్రేడింగ్ ప్రారంభంలోనే సెన్సెక్స్ దాదాపు 800 పాయింట్లు పడిపోగా, నిఫ్టీ 23,300 స్థాయి కంటే దిగువకు పడిపోయింది. ఉదయం 9:30 గంటల సమయానికి, సెన్సెక్స్ 73,860.65 వద్ద (1.06% పతనం), నిఫ్టీ 23,268.20 వద్ద (0.92% పతనం) ట్రేడవుతున్నాయి. ఈ ఒత్తిడి కారణంగా, బీఎస్ఈలో నమోదైన కంపెనీల మార్కెట్ విలువ రూ. 4.47 లక్షల కోట్లకు పైగా క్షీణించింది. అంటే మార్కెట్ ప్రారంభమైన కొద్ది సేపటికే మదుపర్ల సంపద భారీగా ఆవిరైపోయింది.
మార్కెట్ పతనానికి 6 ప్రధాన కారణాలు:
- ముడి చమురు ధరల పెరుగుదల: ఇరాన్-అమెరికా ఉద్రిక్తతలు మరియు లెబనాన్పై ఇజ్రాయెల్ దాడుల వల్ల బ్రెంట్ క్రూడ్ ధరలు సుమారు 1% పెరిగి బ్యారెల్కు $97కి చేరువయ్యాయి. ప్రపంచ చమురు రవాణాలో కీలకమైన హోర్ముజ్ జలసంధి మూతపడే అవకాశం ఉండటంతో ఇంధన మార్కెట్లో ఆందోళన నెలకొంది.
- రూపాయి రికార్డు స్థాయి కనిష్టానికి: చమురు ధరల పెరుగుదల, విదేశీ మారక ద్రవ్య మార్కెట్లో నెలకొన్న అప్రమత్తత వల్ల రూపాయి విలువ అమెరికన్ డాలర్తో పోలిస్తే 14 పైసలు తగ్గి 95.50కి పడిపోయింది. పెరుగుతున్న దిగుమతి బిల్లులు, ద్రవ్యోల్బణం భారత్కు సవాలుగా మారాయి.
- విదేశీ మదుపర్ల (FIIs) భారీ అమ్మకాలు: విదేశీ సంస్థాగత పెట్టుబడిదారులు భారత మార్కెట్ నుండి నిరంతరం డబ్బును ఉపసంహరించుకుంటున్నారు. మంగళవారం వారు ఏకంగా రూ. 8,363 కోట్ల విలువైన షేర్లను విక్రయించారు.
- ఐటీ (IT) షేర్లలో పతనం: గత కొన్ని సెషన్లలో భారీ లాభాలను చవిచూసిన ఐటీ షేర్లలో మదుపర్లు లాభాల స్వీకరణకు (Profit booking) మొగ్గు చూపారు. నిఫ్టీ ఐటీ ఇండెక్స్ మంగళవారం 4% పెరిగినప్పటికీ, ఈరోజు పతనం కావడంతో మార్కెట్ సెంటిమెంట్ దెబ్బతింది.
- ఆర్థిక వృద్ధిపై ఒత్తిడి: నెమ్మదించిన ఆర్థిక వృద్ధి రేటు, పెరుగుతున్న ద్రవ్యోల్బణం కారణంగా ఆర్థిక సంవత్సరం 2027లో భారతీయ కంపెనీల లాభాల వేగం తగ్గే అవకాశం ఉందని నిపుణులు భావిస్తున్నారు.
- బాండ్ ఈల్డ్స్ పెరుగుదల: ప్రపంచ అనిశ్చితి నేపథ్యంలో అమెరికా ట్రెజరీ బాండ్ ఈల్డ్స్ పెరగడం వల్ల, బాండ్లలో పెట్టుబడులు ఆకర్షణీయంగా మారాయి. ఇది ఈక్విటీ మార్కెట్లపై ఒత్తిడిని పెంచింది.
మదుపర్ల సంపద హుష్కాకి: ఈ పతనం వల్ల షేర్ మార్కెట్ విలువలో రూ. 4,47,165.35 కోట్ల నష్టం వాటిల్లింది. ఒకరోజు ముందు రూ. 4,62,67,787.61 కోట్లుగా ఉన్న బీఎస్ఈ విలువ, కేవలం 20 నిమిషాల్లోనే రూ. 4,58,20,622.26 కోట్లకు పడిపోయింది.