సముద్రం అడుగున మనిషికి, ఓ సముద్ర జీవికి మధ్య ఏకంగా 30 ఏళ్లుగా కొనసాగుతున్న అనుబంధం ఇప్పుడు ప్రపంచవ్యాప్తంగా అందరి దృష్టిని ఆకర్షిస్తోంది.
జపాన్‌లోని చిబా ప్రిఫెక్చర్‌లో ఉన్న తతేయామా తీర ప్రాంతంలో డైవర్ హిరోయుకి అరాకావాకు, ‘యోరికో’ అనే ఏషియన్ షీప్‌హెడ్ రాస్ చేపకు మధ్య ఉన్న ఈ ప్రత్యేకమైన బంధం శాస్త్రవేత్తలను కూడా ఆశ్చర్యపరుస్తోంది.
సముద్రం అడుగున ఉన్న ఓ ఆధ్యాత్మిక ప్రదేశం నిర్వహణ బాధ్యతలు చూసే హిరోయుకి అరాకావా… తన పనిలో భాగంగా తరచూ సముద్రంలోకి డైవ్ చేస్తుంటారు.
దాదాపు 30 ఏళ్ల క్రితం, గాయాలతో సముద్రంలో ఇబ్బంది పడుతున్న ఓ చేపను ఆయన గుర్తించారు. దానికి ఆహారం అందిస్తూ, అవసరమైన సహాయం చేస్తూ… అది పూర్తిగా కోలుకునే వరకు సంరక్షించారు.
ఆ తర్వాత ఆ చేప అదే ప్రాంతంలో ఉండిపోయింది. అంతేకాదు… క్రమంగా అరాకావాను గుర్తించడం ప్రారంభించింది.
అరాకావా దానికి ‘యోరికో’ అని పేరు పెట్టారు. అప్పటి నుంచి ఈ ఇద్దరి మధ్య ఒక ప్రత్యేకమైన అనుబంధం ఏర్పడింది.
అరాకావా సముద్రంలోకి వెళ్లినప్పుడల్లా… యోరికో అతని దగ్గరకు వచ్చేస్తుంది. ఎలాంటి భయం లేకుండా అతనితో సన్నిహితంగా ఉండటం… ఇప్పుడు అందరినీ ఆశ్చర్యపరుస్తోంది.
ఇక్కడ మరో ఆసక్తికరమైన విషయం ఏమిటంటే… చేపలకు కూడా మనుషుల ముఖాలను గుర్తించే సామర్థ్యం ఉందా? అనే అంశంపై శాస్త్రవేత్తలు ఇప్పటికే పరిశోధనలు చేస్తున్నారు.
2016లో ‘సైంటిఫిక్ రిపోర్ట్స్’ జర్నల్‌లో ప్రచురితమైన ఓ పరిశోధన ప్రకారం… కొన్ని రకాల చేపలు మనుషుల ముఖాలను గుర్తించగల సామర్థ్యాన్ని కలిగి ఉన్నట్లు తేలింది. ముఖ్యంగా ఆర్చర్‌ఫిష్ అనే చేపలు మనుషుల ముఖాలను చాలా ఖచ్చితంగా గుర్తించగలవని పరిశోధకులు గుర్తించారు.
అలాగే రాస్ జాతికి చెందిన చేపలు కూడా మంచి అభ్యాస సామర్థ్యాన్ని కలిగి ఉంటాయని పరిశోధనలు సూచిస్తున్నాయి. కొన్ని సందర్భాల్లో అవి వస్తువులను ఉపయోగించడం, ఇతర జీవులతో సహకార ప్రవర్తన చూపించడం వంటి ఆసక్తికరమైన లక్షణాలను ప్రదర్శిస్తాయి.
అయితే… యోరికోతో అరాకావాకు మూడు దశాబ్దాలుగా కొనసాగుతున్న ఈ అనుబంధం మాత్రం మరింత ప్రత్యేకమైనది.
అరాకావా ఎలాంటి నిర్దిష్ట షెడ్యూల్ ప్రకారం సముద్రంలోకి డైవ్ చేయరు. అయినప్పటికీ… ఆయన అక్కడికి వెళ్లిన ప్రతిసారీ యోరికో ఆయన దగ్గరకు రావడం కనిపిస్తుంది.
ఇది కేవలం ఆహారం, అలవాటు వల్ల ఏర్పడిన ప్రవర్తనా…? లేక నిజంగానే ఆ చేప అరాకావాను గుర్తుపెట్టుకుంటుందా?
ఇదే ఇప్పుడు పరిశోధకులను ఆసక్తికి గురిచేస్తున్న ప్రశ్న.
మొత్తానికి… మనిషి, సముద్ర జీవుల మధ్య ఉన్న అనుబంధం గురించి మనకు తెలిసిన విషయాలను మరోసారి ఆలోచించేలా చేస్తున్న ఈ 30 ఏళ్ల స్నేహం ప్రస్తుతం సోషల్ మీడియాలో వైరల్‌గా మారింది.
Leave a Reply