ఐపీఎల్ 2026లో రాజస్థాన్ రాయల్స్ బ్యాటర్లు వైభవ్ సూర్యవంశీ (52), యశస్వి జైస్వాల్ (38*) మెరుపు ఇన్నింగ్స్‌ల ధాటికి చెన్నై సూపర్ కింగ్స్ 8 వికెట్ల తేడాతో చిత్తయింది. సోమవారం బార్సపరా స్టేడియంలో జరిగిన ఈ మ్యాచ్‌లో ధోనీ లేకుండా బరిలోకి దిగిన చెన్నై మొదట కేవలం 127 పరుగులకే కుప్పకూలింది.
అనంతరం లక్ష్య ఛేదనలో రాజస్థాన్ కేవలం 12.1 ఓవర్లలోనే విజయాన్ని అందుకుంది. చెన్నై బౌలింగ్, బ్యాటింగ్ రెండూ వైభవ్ ధాటికి నిలవలేకపోయాయి.
17 బంతుల్లోనే 52 పరుగులు – విధ్వంసకర ఇన్నింగ్స్: భారత క్రికెట్ భావి తారగా భావిస్తున్న వైభవ్ సూర్యవంశీ, తన మెరుపు బ్యాటింగ్‌తో మ్యాచ్‌ను ఏకపక్షం చేశాడు. కేవలం 17 బంతుల్లోనే 52 పరుగులు చేసి చెన్నై బౌలర్లను ముప్పుతిప్పలు పెట్టిన ఈ 15 ఏళ్ల కుర్రాడిపై ఇప్పుడు అంతర్జాతీయ క్రికెట్ దృష్టి పడింది. ముఖ్యంగా ఐస్‌లాండ్ క్రికెట్ బోర్డు నుండి అతనికి ఒక ఆసక్తికరమైన ఆఫర్ వచ్చింది.
వైభవ్‌కు విదేశీ బోర్డు ఆఫర్: వైభవ్ నిర్భయమైన బ్యాటింగ్‌ను చూసి ఐస్‌లాండ్ క్రికెట్ బోర్డు సోమవారం సోషల్ మీడియా వేదికగా ఒక ఆసక్తికరమైన పోస్ట్ చేసింది. “ఒకవేళ భారత్ అతడిని ఎంపిక చేయకపోతే, వైభవ్ సూర్యవంశీ ఐస్‌లాండ్ తరపున ఆడేందుకు అవసరమైన 4 ఏళ్ల నిబంధన కాలపరిమితిని పూర్తి చేయవచ్చు. అప్పటికి కూడా అతను టీనేజర్‌గానే ఉంటాడు” అని పేర్కొంది. ఇది కేవలం హాస్యోక్తిగా చేసిన ట్వీట్ అయినప్పటికీ, వైభవ్ ప్రతిభను ప్రపంచం ఎంతగా గుర్తిస్తుందో దీనిని బట్టి అర్థం చేసుకోవచ్చు.
కోటీశ్వరుడిగా రికార్డు: బీహార్‌కు చెందిన వైభవ్ కథ ఒక సినిమాను తలపిస్తుంది. ఐపీఎల్ 2025 వేలంలో రాజస్థాన్ రాయల్స్ అతడిని ₹1.1 కోట్లకు కొనుగోలు చేయడంతో, ఐపీఎల్ చరిత్రలోనే అత్యంత పిన్న వయస్కుడైన కోటీశ్వరుడిగా అతను రికార్డు సృష్టించాడు. గతంలో గుజరాత్ టైటాన్స్‌పై కేవలం 35 బంతుల్లోనే సెంచరీ బాది తన సత్తా చాటిన వైభవ్, ఇప్పుడు చెన్నైపై 17 బంతుల్లోనే హాఫ్ సెంచరీ చేసి తన ఫామ్ కేవలం అదృష్టం (Fluke) కాదని నిరూపించాడు.