సింగపూర్‌లో ఆర్టిఫిషియల్ ఇంటెలిజెన్స్ (ఏఐ) సాంకేతికతను ఉపయోగించి సరదాగా సృష్టించిన ఓ నకిలీ మొసలి ఫోటో ఇంటర్నెట్‌లో దావానలంలా వ్యాపించింది. అక్కడి జలాశయాల్లో రాక్షస మొసళ్లు సంచరిస్తున్నట్లు చిత్రీకరించిన ఈ ఫోటో సోషల్ మీడియాలో వైరల్ కావడంతో, ప్రజల్లో తీవ్ర భయాందోళనలు నెలకొన్నాయి. పరిస్థితి తీవ్రతను గ్రహించిన సింగపూర్ జాతీయ జలమండలి (నేషనల్ వాటర్ ఏజెన్సీ) తక్షణమే అప్రమత్తమై, ఆయా ప్రాంతాల్లో గాలింపు చర్యలు చేపట్టింది. అంతేకాకుండా, ప్రజలెవరూ ఆ జలాశయాల వైపు వెళ్లవద్దని, వాటిని ఉపయోగించవద్దని హెచ్చరించింది.
ఈ భయాందోళనలకు కారణమైన వారి వెనుక ‘రే లిన్’ (Ray Lin) అనే వ్యక్తి ఉన్నట్లు అధికారులు గుర్తించారు. అతను కేవలం వినోదం కోసమే ఏఐ సహాయంతో ఈ నకిలీ మొసలి ఫోటోను సృష్టించి ఆన్‌లైన్‌లో వ్యాప్తి చేశాడు. అయితే, ప్రజల్లో తీవ్ర భయాందోళనలు రేకెత్తించిన ఈ చర్యను ప్రభుత్వం చాలా సీరియస్‌గా తీసుకుంది. దీనికిగానూ ఆ వ్యక్తిపై కఠిన చట్టపరమైన చర్యలు తీసుకోనున్నారని, అతనికి 3 ఏళ్ల వరకు జైలు శిక్ష లేదా భారతీయ కరెన్సీలో సుమారు రూ. 6.2 లక్షల వరకు జరిమానా విధించే అవకాశం ఉందని సమాచారం.
ప్రస్తుత కాలంలో ఏఐ సాంకేతికతను దుర్వినియోగం చేయడం వల్ల ఎలాంటి అనర్థాలు జరుగుతాయనడానికి ఈ సంఘటన ఒక సజీవ సాక్ష్యంగా నిలిచింది. ఇంటర్నెట్‌లో చెక్కర్లు కొట్టే ఆధారాలు లేని నకిలీ వార్తలను, ఫోటోలను నిజానిజాలు సరిచూసుకోకుండా షేర్ చేయడం వల్ల ఎలాంటి చట్టపరమైన చిక్కులు ఎదుర్కోవాల్సి వస్తుందో ఇది స్పష్టం చేస్తోంది. ప్రజల భద్రతకు ముప్పు కలిగించే విధంగా ఇలాంటి పుకార్లను వ్యాప్తి చేసే వారిపై కఠిన చర్యలు తీసుకుంటామని ఈ సంఘటన తేటతెల్లం చేస్తోంది.
Leave a Reply