రాయ్‌పూర్‌లోని బీర్‌గావ్ ప్రాంతంలో ఉన్న సంగీత పెట్రోల్ పంప్ వద్ద మంగళవారం సాయంత్రం ఒక్కసారిగా కలకలం రేగింది. పెట్రోల్ నింపించుకోవడానికి వచ్చిన ఒక యువకుడు లైటర్ వెలిగించి నిప్పు పెట్టడంతో అక్కడ ఉన్నవారంతా భయాందోళనలకు గురయ్యారు. పెట్రోల్ బంక్ సిబ్బంది సమయస్ఫూర్తితో వ్యవహరించడంతో పెను ప్రమాదం తప్పింది. ఈ ఘటనకు సంబంధించిన వీడియో సోషల్ మీడియాలో వైరల్ కావడంతో పోలీసులు ఇద్దరు నిందితులను అరెస్ట్ చేశారు.
ఫిబ్రవరి 17 సాయంత్రం అసలేం జరిగింది? సమాచారం ప్రకారం, ఫిబ్రవరి 17 సాయంత్రం ఏడు గంటల సమయంలో ఇద్దరు యువకులు బైక్‌పై పెట్రోల్ పోయించుకోవడానికి వచ్చారు. ఆ సమయంలో బైక్ వెనుక కూర్చున్న యువకుడు కిందకు దిగి సిగరెట్ వెలిగించడానికి ప్రయత్నించాడు. పెట్రోల్ పంప్ ప్రాంగణంలో సిగరెట్ వెలిగించవద్దని అతని స్నేహితుడు సలహా ఇచ్చాడు.
ఈ చిన్న మాటకే ఆగ్రహం చెందిన ఆ యువకుడు తన చేతిలో ఉన్న లైటర్‌తో పెట్రోల్ ట్యాంక్ దగ్గర నిప్పు పెట్టాడు. చూస్తుండగానే మంటలు ఒక్కసారిగా ఎగసిపడ్డాయి. దీంతో అక్కడున్న సిబ్బంది, ఇతర కస్టమర్లు భయంతో పరుగులు తీశారు.
సిబ్బంది సమయస్ఫూర్తి: మంటలు ఎగసిపడగానే పెట్రోల్ పోస్తున్న సిబ్బంది వెంటనే అప్రమత్తమై మిషన్ వదిలేసి వెనక్కి తప్పుకున్నారు. ఆ మంటలు నిందితుడిపై కూడా పడటంతో అతను భయంతో అక్కడి నుంచి పారిపోయాడు. సిబ్బంది వెంటనే అగ్నిమాపక యంత్రాలను (Fire Extinguishers) ఉపయోగించి కొద్ది నిమిషాల్లోనే మంటలను అర్పేశారు. ఒకవేళ ఏ కొంచెం ఆలస్యమైనా మంటలు భూగర్భంలోని ట్యాంకులకు వ్యాపించి భారీ పేలుడు సంభవించి ఉండేది.
నిందితుల అరెస్ట్: ఘటన అనంతరం నిందితులు అక్కడి నుంచి పరారయ్యారు. అయితే వీడియో వైరల్ కావడంతో ఛత్తీస్‌గఢ్ పోలీసులు దర్యాప్తు చేపట్టి ఇమ్రాన్ ఖురేషీతో పాటు మరో నిందితుడిని అరెస్ట్ చేశారు. ప్రస్తుతం పోలీసులు కేసును విచారిస్తున్నారు.