హైదరాబాద్: కేవలం 26 ఏళ్ల వయసున్న ఒక యువకుడు.. అతనికి సిగరెట్ తాగడం, మద్యం సేవించడం లాంటి ఎలాంటి చెడు అలవాట్లూ లేవు. చూడటానికి కూడా శరీరం ఎంతో దృఢంగా, పూర్తి ఆరోగ్యంగా కనిపించేవాడు. కానీ, అతను తన కలల్లో కూడా ఊహించని ఒక ప్రమాదకరమైన అలవాటు అతడిని మంచానపడేలా చేసింది. అదే ‘నిద్రలేమి’ (సరైన నిద్ర లేకపోవడం).
ఆయుర్వేద నిపుణులు డాక్టర్ రిషికేష్ ఖాండేకర్ తెలిపిన వివరాల ప్రకారం.. నిద్రలేమి అనేది కేవలం శారీరక అలసటను మాత్రమే కలిగించదు; అది శరీరంలోని రక్తాన్ని చిక్కగా మార్చి, రక్తపోటును (బిపి) విపరీతంగా పెంచుతుంది.
దీనివల్ల శరీరంలో ‘స్ట్రెస్ హార్మోన్లు’ (మానసిక ఒత్తిడిని పెంచే హార్మోన్లు) విడుదలై, అంతర్గతంగా జరిగే కణాల మరమ్మతు ప్రక్రియను (Body Repairing) పూర్తిగా స్తంభింపజేస్తాయి. చాలామంది వారమంతా తక్కువ సమయం నిద్రపోయి, శని, ఆదివారాల్లో ఎక్కువ సమయం పడుకుని ఆ నిద్రను భర్తీ చేయవచ్చని భావిస్తారు. కానీ, శాస్త్రీయంగా నిద్రను అలా ఎప్పటికీ భర్తీ చేయలేమని వైద్యులు హెచ్చరిస్తున్నారు.
జుట్టు రాలడానికి ప్రధాన కారణం ఇదే:
క్రమరహిత నిద్ర చక్రం (Improper Sleep Cycle) కేవలం శరీరాన్ని మాత్రమే కాకుండా, మానసిక స్థితిని, జుట్టు ఆరోగ్యాన్ని కూడా తీవ్రంగా దెబ్బతీస్తుంది. నిద్ర సరిగ్గా లేకపోవడం వల్ల తలలోని స్కాల్ప్కు రక్త ప్రసరణ తగ్గిపోతుంది. దీనికి మానసిక ఒత్తిడి తోడై కొత్త జుట్టు రావడం ఆగిపోవడమే కాకుండా, విపరీతంగా జుట్టు రాలడం మొదలవుతుంది. తమ వద్దకు వచ్చే రోగులలో దాదాపు 90 శాతం మందికి జుట్టు రాలడానికి సరైన నిద్ర లేకపోవడమే ప్రధాన కారణమని వైద్యులు చెబుతున్నారు.
కేవలం నిద్రను క్రమబద్ధీకరించుకోవడం ద్వారానే జుట్టు రాలడం సమస్యను సగానికి పైగా తగ్గించుకోవచ్చు.
పక్షవాతం నుంచి కోలుకుంటూ యువకుడి హెచ్చరిక:
నిద్రలేమి కారణంగా బ్రెయిన్ స్ట్రోక్ వచ్చి.. పక్షవాతంతో ముడగబడి, ప్రస్తుతం నెమ్మదిగా మళ్లీ నడక నేర్చుకుంటున్న సదరు యువకుడు యువతకు ఒక కీలక విజ్ఞప్తి చేశాడు. “రాత్రి నిద్రను ఎట్టి పరిస్థితుల్లోనూ నిర్లక్ష్యం చేయకండి. నిద్ర అనేది కేవలం విశ్రాంతి మాత్రమే కాదు, అది శరీరం తనను తాను పునరుజ్జీవింపజేసుకునే సమయం. దానిని కోల్పోతే మెదడు, గుండె, జుట్టు.. ఇలా అన్నీ ఒకేసారి మూలపడిపోతాయి” అంటూ తన బాధాకరమైన అనుభవాన్ని వివరిస్తూ విలువైన] సందేశాన్ని ఇచ్చాడు.
Leave a Reply