సోషల్ మీడియాలో తనపై జరుగుతున్న నైతిక దాడుల (Moral Policing) పట్ల నటి ఎస్తర్ అనిల్ తీవ్రంగా స్పందించారు. ఒక ఇంటర్వ్యూలో ఆమె చేసిన వ్యాఖ్యలపై విమర్శలు గుప్పించిన వారికి ఇన్స్టాగ్రామ్ వేదికగా దిమ్మతిరిగే సమాధానం ఇచ్చారు.
అసలేం జరిగింది? బాలనటీమణులు హీరోయిన్లుగా మారే సమయంలో వారిని ‘హైపర్ సెక్సువలైజ్’ (అతిగా లైంగిక కోణంలో చూడటం) చేసే ధోరణి మలయాళీల్లో ఉందని ఎస్తర్ ఒక ఇంటర్వ్యూలో అభిప్రాయపడ్డారు. దీనిపై ఒక నెటిజన్ స్పందిస్తూ.. “తాము హీరోయిన్ రోల్స్ కు సిద్ధమయ్యామని సినిమా వాళ్లకు తెలియజేయడానికే బాలనటులు ఇలాంటి గ్లామర్ షో చేస్తుంటారు” అని కామెంట్ చేశారు.
ఎస్తర్ ఘాటు కౌంటర్: ఈ వ్యాఖ్యలపై ఎస్తర్ ఆగ్రహం వ్యక్తం చేస్తూ ఇలా రాశారు: “సినిమాల్లో రోల్స్ సంపాదించడానికే బట్టలు విప్పుతారనే ఈ అర్థం లేని మాటలను ఇకనైనా ఆపకూడదా? సోషల్ మీడియాలో గ్లామరస్గా ఉండటం వల్ల మాత్రమే హీరోయిన్లుగా మారిన ప్రతిభావంతులు ఎందరున్నారో చెప్పగలరా? ఒక్కరు కూడా లేరు. ఒకవేళ ఎవరైనా అలా చేసినా, అది వారి వ్యక్తిగతం.. ఇతరులకు దాంతో ఏం సంబంధం?”
ఆమె ఇంకా కొనసాగిస్తూ.. “మలయాళ సినిమా ఎప్పుడూ కళాకారుల ప్రతిభ, నైపుణ్యం మీదనే ఆధారపడి నిలబడుతుంది తప్ప కేవలం వస్త్రధారణ లేదా నగ్న ప్రదర్శనపై కాదు. సోదరా.. నీ సమస్య ఏంటి? ఎక్కువ మంది ఫాలోవర్ల కోసం ఇలాంటి చౌకబారు విమర్శలు చేస్తున్నావా? సాధారణంగా నేను ఇలాంటి వాటికి స్పందించను. కానీ ఈరోజు ఇలాంటి వారి ముసుగు తొలగించడం అవసరమని అనిపించింది” అని తన ఇన్స్టాగ్రామ్ స్టోరీలో పేర్కొన్నారు.
గతంలో కూడా బాడీ షేమింగ్ చేసే వారికి ఎస్తర్ ఇదే తరహాలో చుక్కలు చూపించారు. నటీమణుల వస్త్రధారణపై విమర్శలు చేసే వారికి ఆమె ఇచ్చిన ఈ సమాధానం ఇప్పుడు నెట్టింట వైరల్ అవుతోంది.