పలు జిల్లాల్లో ప్రస్తుతం వంట గ్యాస్ సిలిండర్ల సరఫరాలో కొంత కొరత ఏర్పడినట్లు ఫిర్యాదులు అందుతున్నాయి. ఇటువంటి తరుణంలో, మీ ఇంటికి సిలిండర్ అంతరాయం లేకుండా రావాలంటే సరైన పద్ధతిలో బుకింగ్ చేయడం మరియు ప్రభుత్వం ప్రకటించిన కొత్త నిబంధనలను పాటించడం చాలా ముఖ్యం. దానికి సంబంధించిన వివరాలను ఇప్పుడు చూద్దాం.
ప్రస్తుతం వంట గ్యాస్ బుకింగ్ కోసం ఫోన్ కాల్, ఎస్ఎంఎస్, ఆన్‌లైన్ పోర్టల్, మొబైల్ యాప్, వాట్సాప్ వంటి ఎన్నో డిజిటల్ మార్గాలు అందుబాటులోకి వచ్చాయి. అయితే చాలా మందికి ఇంకా సరైన నంబర్లు, పద్ధతులు తెలియడం లేదు.
ముందుగా బుకింగ్ నంబర్ల వివరాలు:
- ఇండేన్ గ్యాస్ (Indane Gas): వినియోగదారులు 7588888824 నంబర్ ద్వారా వాట్సాప్ లేదా కాల్ చేసి సిలిండర్ బుక్ చేసుకోవచ్చు.
- హెచ్‌పి గ్యాస్ (HP Gas): 92222 01122 నంబర్ ద్వారా సులభంగా బుక్ చేయవచ్చు.
- భారత్ పెట్రోలియం (Bharat Petroleum): 1800224344 నంబర్‌కు “Hi” అని మెసేజ్ పంపితే మీ సిలిండర్ బుక్ అవుతుంది.
Paytm, PhonePe, Google Pay వంటి యాప్‌ల ద్వారా కూడా బుకింగ్ చేసుకోవచ్చు. అయితే, మీ మొబైల్ నంబర్ గ్యాస్ ఏజెన్సీలో కచ్చితంగా నమోదై ఉండాలి.
గ్యాస్ కనెక్షన్ పేరు మార్పిడి (Transfer): కనెక్షన్ పేరు మార్చడంపై చాలా మందికి సందేహాలు ఉంటాయి. కనెక్షన్ ఒక పురుషుడి పేరు మీద ఉంటే, అతని నుండి “నో అబ్జెక్షన్ సర్టిఫికేట్” (NOC) తీసుకోవాలి. ఒకవేళ వివాహిత పేరు మీద ఉంటే, ఆమె కుమార్తె మరియు భర్త ఇద్దరి నుండి విడివిడిగా NOC తీసుకోవాలి. ఈ సర్టిఫికేట్‌తో పాటు రేషన్ కార్డ్ నకలును గ్యాస్ ఏజెన్సీలో సమర్పించాలి. ఆ తర్వాత సిబ్బంది మీ ఇంటికి వచ్చి తనిఖీ చేస్తారు. అంతా సవ్యంగా ఉంటే పేరు మారుస్తారు. అయితే, ఈ ప్రక్రియ పూర్తయ్యే వరకు గ్యాస్ సరఫరా తాత్కాలికంగా నిలిచిపోయే అవకాశం ఉంది.
మరణ ధృవీకరణ పత్రం: కనెక్షన్ ఉన్న వ్యక్తి మరణిస్తే, వారి మరణ ధృవీకరణ పత్రం (Death Certificate) మరియు వారసత్వ ధృవీకరణ పత్రం (Succession Certificate) ఏజెన్సీలో సమర్పించాల్సి ఉంటుంది.
కేంద్ర ప్రభుత్వం కొత్త నిబంధన – eKYC తప్పనిసరి: కేంద్ర పెట్రోలియం మరియు సహజ వాయువు మంత్రిత్వ శాఖ ఇటీవలే ఒక ముఖ్యమైన ప్రక్రియను తప్పనిసరి చేసింది. గృహ అవసరాల కోసం ఎల్‌పిజి వాడుతున్న ప్రతి వినియోగదారుడు eKYC లేదా బయోమెట్రిక్ ఆధార్ అథెంటికేషన్‌ను పూర్తి చేయాలి. దీనిని ‘Aadhaar FaceRD’ యాప్ ద్వారా లేదా సంబంధిత గ్యాస్ కంపెనీ యాప్ ద్వారా ఇంట్లోనే కూర్చుని చేసుకోవచ్చు. లేదా గ్యాస్ డీలర్ల సహాయం తీసుకోవచ్చు. ఈ నిబంధనలు పాటిస్తేనే సిలిండర్ కొరత ఉన్న సమయంలో కూడా ఎటువంటి ఇబ్బంది లేకుండా గ్యాస్ పొందవచ్చు.