తమిళ వెట్రి కళగం (TVK) మూడవ ఏడాది ప్రారంభోత్సవ వేడుక ఈరోజు విజయ్ అధ్యక్షతన పనైయూర్‌లో జరిగింది. అదే సమయంలో ముఖ్యమంత్రి స్టాలిన్ కూడా పర్యాటక సదస్సును ప్రారంభించేందుకు మహాబలిపురం వెళ్లే క్రమంలో అదే ఈసీఆర్ (ECR) రోడ్డు మీదుగా ప్రయాణించారు.
ముఖ్యమంత్రి కాన్వాయ్ మరియు విజయ్ కారు ఒకే సమయంలో నీలాంగరైని దాటాల్సి రావడంతో, పరిస్థితి వేడెక్కిందని.. దీనిపై అసహనం వ్యక్తం చేసిన ముఖ్యమంత్రి కార్యాలయం ఇంటెలిజెన్స్ అధికారులను తీవ్రంగా మందలించిందని సమాచారం.
అసలేం జరిగిందంటే? టీవీకే కార్యక్రమం కోసం ఉదయం 9:55 గంటలకు విజయ్ తన నీలాంగరై నివాసం నుండి బయలుదేరారు. అదే సమయంలో ముఖ్యమంత్రి కాన్వాయ్ కూడా నీలాంగరై వైపు వస్తోంది. దీనివల్ల పోలీసులు కాన్వాయ్ కోసం ఈసీఆర్ రోడ్డుకు కలిసే పక్క రోడ్లను బ్లాక్ చేశారు. ఈ క్రమంలో విజయ్ ప్రయాణిస్తున్న కారు కూడా ఇతర వాహనాలతో పాటు 2-3 నిమిషాల పాటు నిలిపివేయబడింది. కాన్వాయ్ వెళ్ళిపోయాక ట్రాఫిక్‌ను క్లియర్ చేశారు.
న్యూస్ ఛానళ్ల హడావుడి విజయ్ ఇంటి నుండి బయలుదేరడాన్ని కవర్ చేయడానికి వచ్చిన మీడియా సంస్థలు.. ముఖ్యమంత్రి కోసం విజయ్ కారును ఆపేశారంటూ లైవ్ ఇచ్చేశాయి. దీంతో ఈ విషయం సోషల్ మీడియాలో వైరల్ అయ్యింది. ఇది గమనించిన ఇంటెలిజెన్స్ అధికారులకు పై నుండి పిలుపు వచ్చింది. “ముఖ్యమంత్రి పర్యటన ఉందని తెలిసినప్పుడు, విజయ్ వర్గానికి ముందే సమాచారం ఇచ్చి ఆయనను సీఎం రాకకంటే ముందే లేదా తర్వాత రమ్మని చెప్పాలి కదా? ఇంత అజాగ్రత్తగా ఎలా ఉంటారు?” అంటూ అధికారులు వారిపై ఆగ్రహం వ్యక్తం చేశారు.
ఇంటెలిజెన్స్ అధికారుల వివరణ “కార్యక్రమం 11 గంటలకు అని టీవీకే ప్రకటించింది. అందుకే విజయ్ 10:40 తర్వాత బయలుదేరుతారని మేము భావించాము. కానీ ఎవరో జ్యోతిష్య కారణాలు చెప్పడంతో ఆయన అనుకున్న సమయం కంటే ముందే బయలుదేరారు. ఈ చిన్న విషయాన్ని మీడియా వారు పెద్దది చేసి లైవ్ ఇచ్చారు” అని ఇంటెలిజెన్స్ వర్గాలు వివరణ ఇచ్చుకున్నాయి.