తమిళనాడు: కరూర్‌కు చెందిన ఓ హోటల్ యజమాని నుండి ₹10 లక్షల నగదు, ఒక BMW కారు మరియు ఐదు సవర్ల బంగారు ఆభరణాలను తీసుకుని మోసం చేసినట్లు వచ్చిన ఫిర్యాదుతో సీరియల్ నటి రాణి, ఆమె భర్తతో సహా ముగ్గురిపై కరూర్ పోలీసులు కేసు నమోదు చేశారు.
అసలేం జరిగింది?
నామక్కల్ జిల్లా తిరుచెంగోడ్‌కు చెందిన దినేష్ రాజ్ కరూర్ నగరంలోని కోయంబత్తూరు రోడ్డులో హోటల్ నిర్వహిస్తున్నారు. వ్యాపార అవసరాల కోసం ఆయనకు డబ్బు అవసరం పడటంతో, చెన్నై వలసరవాక్కంకు చెందిన బాలాజీ (అలియాస్ బాలమురుగన్) అనే వ్యక్తి పరిచయమయ్యాడు.
నమ్మబలికారు: బాలాజీ తనకు కరూర్‌లో తెలిసిన వారు ఉన్నారని చెప్పి వడివేలు అనే వ్యక్తిని దినేష్ రాజ్‌కు పరిచయం చేశాడు. వీరందరూ కలిసి ఒక ఒప్పందం కుదుర్చుకుని, హోటల్‌లోనే ₹10 లక్షల నగదును బాలాజీకి అందజేశారు.
కారు, బంగారం మాయం: దినేష్ రాజ్ తన ఆర్థిక ఇబ్బందుల గురించి చెప్పినప్పుడు, రెండు రోజుల్లో చెన్నై వెళ్లి సమస్యను పరిష్కరిస్తానని బాలాజీ నమ్మబలికాడు. తన భార్య (నటి రాణి)కి చూపించి వెంటనే తిరిగి ఇచ్చేస్తానని చెప్పి, దినేష్ రాజ్‌కు చెందిన ₹80 లక్షల విలువైన BMW కారు, ఆయన కుమార్తెకు చెందిన 5 సవర్ల బంగారు కమ్మలను తీసుకున్నాడు.
బాలాజీతో పాటు ఉన్న పురుషోత్తమన్ అనే వ్యక్తి ఇచ్చిన హామీని నమ్మి దినేష్ రాజ్ తన నగదు, కారు మరియు నగలను వారి వద్ద అప్పగించారు.
కత్తితో దాడికి ప్రయత్నం
రోజులు గడిచినా బాలాజీ కారును కానీ, నగదును కానీ తిరిగి ఇవ్వలేదు. దినేష్ రాజ్ పలుమార్లు అడిగినా సరైన సమాధానం రాలేదు. చివరికి కరూర్‌లో బాలాజీని నిలదీయగా, అతను తన వద్ద దాచుకున్న పెన్ కత్తితో దినేష్‌పై దాడికి ప్రయత్నించినట్లు బాధితుడు ఆరోపించారు.
పోలీసుల చర్య
బాధితుడు దినేష్ రాజ్ కరూర్ టౌన్ పోలీస్ స్టేషన్‌లో ఫిర్యాదు చేశారు. తనను నమ్మించి మోసం చేసిన బాలాజీ, అతని భార్య నటి రాణి మరియు స్నేహితుడు పురుషోత్తమన్‌లపై చర్యలు తీసుకుని, తన ఆస్తులను తిరిగి ఇప్పించాలని కోరారు.
దినేష్ రాజ్ ఫిర్యాదు మేరకు పోలీసులు బాలాజీ, నటి రాణి, పురుషోత్తమన్‌లపై BNS 296(b), 115(2), 316(5), 318(4), 351(3) వంటి ఐదు సెక్షన్ల కింద కేసు నమోదు చేశారు. ఈ వ్యవహారంపై నటి రాణి త్వరలో వివరణ ఇచ్చే అవకాశం ఉందని తెలుస్తోంది.