భారత మహిళా క్రికెట్ జట్టు స్టార్ ప్లేయర్లు స్మృతి మంధాన, జెమిమా రోడ్రిగ్స్ మైదానంలో ఎంత దూకుడుగా ఆడతారో, మైదానం బయట అంతటి ప్రాణ స్నేహితులు. ఒకరి కష్టంలో మరొకరు అండగా నిలబడటం వీరి స్నేహానికి నిదర్శనం. అయితే, ఇప్పుడు వీరిద్దరి బంధం మధ్యలోకి మతం అనే అంశం వచ్చి చేరింది. క్రిస్మస్ వేడుకలకు సంబంధించిన ఒక ఫోటో సోషల్ మీడియాలో పెను చర్చకు, ట్రోలింగ్‌కు దారితీసింది.
స్నేహానికి అడ్డుగా మతం?
జెమిమా రోడ్రిగ్స్ క్రైస్తవ మతాన్ని అనుసరిస్తుండగా, స్మృతి మంధాన సంప్రదాయ హిందూ కుటుంబం నుండి వచ్చారు. అయినప్పటికీ వీరి స్నేహానికి మతం ఎప్పుడూ అడ్డు రాలేదు. ఇటీవల స్మృతి మంధాన వ్యక్తిగత జీవితంలో కొన్ని ఒడిదుడుకులు ఎదురైనప్పుడు, ముఖ్యంగా ఆమె పెళ్లి సంబంధం విషయంలో మనస్తాపానికి గురైనప్పుడు, జెమిమా తన ప్రతిష్టాత్మక ‘బిగ్ బాష్ లీగ్’ టోర్నమెంట్‌ను కూడా వదులుకుని తన స్నేహితురాలికి అండగా నిలిచారు.
తిరువనంతపురంలో శాంతా టోపీతో సందడి
ప్రస్తుతం భారత మహిళా జట్టు శ్రీలంకతో టీ20 సిరీస్ కోసం తిరువనంతపురంలో ఉంది. క్రిస్మస్ సందర్భంగా జెమిమా రోడ్రిగ్స్ హోటల్‌లో వేడుకలు నిర్వహించారు. ఈ వేడుకల్లో స్మృతి మంధానతో పాటు మరో ఆటగాడు అరుంధతి రెడ్డి కూడా శాంతా క్లాస్ టోపీలు ధరించి సందడి చేశారు. నవ్వుతూ ఫోజులిచ్చిన ఈ ఫోటోలు సోషల్ మీడియాలో వైరల్ అవ్వగానే వివాదం మొదలైంది.
నెటిజన్ల ఆగ్రహానికి కారణమేంటి?
ఈ ఫోటోలను చూసిన కొందరు నెటిజన్లు స్మృతి మంధాన తీరును ప్రశ్నిస్తూ ట్రోల్ చేస్తున్నారు. దీనికి ప్రధాన కారణం, ఇటీవల భారత జట్టు సభ్యులు ఆంధ్రప్రదేశ్‌లోని ఒక ప్రముఖ ఆలయాన్ని సందర్శించినప్పుడు, జట్టులోని చాలా మంది సభ్యులు వెళ్లినప్పటికీ జెమిమా రోడ్రిగ్స్ మాత్రం అక్కడ కనిపించలేదు. జెమిమా ఇతర మతస్థురాలు కావడంతో హిందూ దేవాలయాలకు లేదా హిందూ పండుగలకు దూరంగా ఉంటారని నెటిజన్ల వాదన.
అటువంటప్పుడు, స్మృతి మంధాన మాత్రం క్రైస్తవ పండుగ జరుపుకోవడం, శాంతా టోపీ ధరించడం ఎంతవరకు సరైనది? అని కొందరు ప్రశ్నిస్తున్నారు. “భారతదేశంలో సెక్యులరిజం లేదా లౌకికవాదం అనేది కేవలం హిందువులకే పరిమితమా? హిందువులు అందరి పండుగలను జరుపుకోవాలి, కానీ ఇతర మతస్థులు హిందూ ఆచారాలకు దూరంగా ఉంటారు.. ఇదేం న్యాయం?” అంటూ సోషల్ మీడియాలో నిప్పులు చెరుగుతున్నారు.
మొత్తానికి, మైదానం వెలుపల ఉన్న వ్యక్తిగత స్నేహం మరియు వేడుకలను ఇప్పుడు మతం అనే కోణంలో చూడటం మొదలైంది. స్మృతి, జెమిమాల క్రిస్మస్ ఫోటోలు నెట్టింట అనుకూల, వ్యతిరేక చర్చలకు వేదికయ్యాయి.