“సొంత ఇల్లు అమ్మి నా ల్యాప్‌టాప్ అప్పు తీర్చమని అడగడం ఏంట్రా న్యాయం?” – నెట్టింట చర్చకు దారితీసిన యువతి వైరల్ పోస్ట్..!!!

నేటి కాలంలో ‘జెన్ జెడ్’ (Gen Z) అని పిలువబడే యువత జీవనశైలి, వారి ఆలోచనా విధానం, అంచనాల గురించి సోషల్ మీడియాలో తరచూ వాడివేడి చర్చలు జరగడం సాధారణమే.

ఇదే కోవలో, తన బంధువుల అమ్మాయి అడిగిన షాకింగ్ కోరిక గురించి ఓ మహిళ సోషల్ మీడియాలో పంచుకున్న పోస్ట్ ఒకటి, నెటిజన్ల మధ్య పెద్ద చర్చకు దారితీసింది.

ఆ అమ్మాయి తాను కొన్న విలాసవంతమైన వస్తువులు, ల్యాప్‌టాప్ కోసం చేసిన అప్పును తీర్చడానికి.. “మీ ఇల్లు తాకట్టు పెట్టి లేదా అమ్మి నాకు డబ్బులు ఇవ్వండి అనడం ఏంటి న్యాయం?” అని సదరు మహిళ ప్రశ్నించడమే ఈ చర్చకు కేంద్ర బిందువైంది.

ఆ పోస్ట్‌లో వివరించిన దాని ప్రకారం.. కుటుంబ ఆర్థిక పరిస్థితిని ఏమాత్రం పట్టించుకోకుండా, విలాసవంతమైన జీవితం గడపాలనే ఆలోచనతో ఆ యువతి ఇష్టానుసారంగా అప్పులు చేసింది. చివరకు అప్పు తీర్చే దారి లేక, కుటుంబంలోని పెద్దల వద్దకు వెళ్లి.. “ఇల్లు తాకట్టు పెట్టి నాకు ఆ డబ్బులు ఇవ్వండి” అని చాలా నిర్లక్ష్యంగా అడిగింది.

కష్టం విలువ, ఒక ఇల్లు కట్టడానికి తల్లిదండ్రులు చిందించిన రక్తం, చెమట గురించి ఎలాంటి అవగాహన లేకుండా.. “నాకు ఇది కావాలి, మీరు అది చేసి తీరాల్సిందే” అనే ధోరణిలో మాట్లాడే ఈ తరహా ప్రవర్తన పలువురిని విస్మయానికి గురిచేసింది.

ఈ పోస్ట్ వైరల్ కావడంతో, నెటిజన్లు పలువురు తమ అభిప్రాయాలను పంచుకుంటున్నారు. “నేటి యువతలో కష్టపడి పనిచేసి సంపాదించాలనే ఆలోచన కంటే, అంతా చాలా సులభంగా తమకు దొరికేయాలనే ఆలోచనే ఎక్కువగా కనిపిస్తోంది” అని పాతతరం వారు తమ ఆవేదనను వ్యక్తం చేస్తున్నారు.

అదే సమయంలో, “అందరు యువతను ఒకే గాటన కట్టలేము” అని కొంతమంది మద్దతుగా మాట్లాడినప్పటికీ.. విలాసాల కోసం కుటుంబ ఆస్తులను పణంగా పెట్టడానికి తెగించే ఈ ప్రమాదకరమైన ధోరణిని తక్షణమే మార్చుకోవాలన్నదే సామాజిక కార్యకర్తల అభిప్రాయంగా ఉంది.