ఇరాన్ యుద్ధంలో అమెరికాకు భారీ నష్టం వాటిల్లింది. సౌదీ అరేబియాలో అమెరికాకు చెందిన AWACS (Airborne Warning and Control System) విమానాన్ని కూల్చివేసినట్లు ఇరాన్ ప్రకటించింది. దీని విలువ సుమారు 300 మిలియన్ డాలర్లు (సుమారు ₹2,500 కోట్లు) ఉంటుందని అంచనా. ఇది E-3 సెంట్రీ (E-3 Sentry) రకానికి చెందిన విమానం.
ఈ వార్తను మొదట ‘ఎయిర్ అండ్ స్పేస్ ఫోర్సెస్ మ్యాగజైన్’ నివేదించింది. ఇరాన్ జరిపిన ఈ దాడిలో 10 మంది సైనికులు గాయపడినట్లు సమాచారం. అయితే, ఈ విషయంలో అమెరికా సెంట్రల్ కమాండ్ (CENTCOM) నుండి ఇంకా ఎటువంటి అధికారిక ప్రకటన వెలువడలేదు. సోషల్ మీడియాలో వైరల్ అవుతున్న ఫోటోలలో బోయింగ్ E-3 విమానం పూర్తిగా ధ్వంసమైన స్థితిలో కనిపిస్తోంది.
ఇరాన్ రివల్యూషనరీ గార్డ్ కోర్ (IRGC), అమెరికా మరియు ఇజ్రాయెల్ ప్రయోజనాలకు సంబంధించిన లక్ష్యాలపై దాడి చేయడానికి సుదూర మరియు మధ్య శ్రేణి క్షిపణులను, అలాగే డ్రోన్లను ఉపయోగించినట్లు ‘ప్రెస్ టీవీ’ పేర్కొంది. ఒక అమెరికన్ MQ-9 డ్రోన్‌ను కూల్చామని, ఒక F-16 జెట్‌ను కూడా లక్ష్యంగా చేసుకున్నామని ఇరాన్ తెలిపింది. గతంలో అమెరికాకు చెందిన 5వ తరం యుద్ధ విమానం F-35 ఎమర్జెన్సీ ల్యాండింగ్ చేసినప్పుడు కూడా తమ క్షిపణుల వల్లే అది జరిగిందని ఇరాన్ పేర్కొంది, కానీ అమెరికా దానిని తోసిపుచ్చింది.
E-3 AWACS గురించిన విశేషాలు:
- తయారీ: దీనిని బోయింగ్ సంస్థ తయారు చేసింది. దీనిని ‘గాల్లో ఎగిరే రాడార్’ అని పిలుస్తారు.
- రాడార్ డిస్క్: ఈ విమానం పైభాగంలో తిరుగుతూ ఉండే ఒక పెద్ద రాడార్ డిస్క్ ఉంటుంది. ఇది సుదూర ప్రాంతాల నుండి వచ్చే ముప్పులను గుర్తించి, ఇతర యుద్ధ విమానాలకు దిశానిర్దేశం చేస్తుంది.
- వ్యూహాత్మక బలం: యుద్ధ సమయంలో ఇది శత్రువుల కదలికలను నిరంతరం గమనిస్తూ అమెరికా లేదా NATO దేశాలకు ముందస్తు హెచ్చరికలను పంపిస్తుంది. ప్రస్తుతం ఈ విమానం యూకే, ఫ్రాన్స్ మరియు సౌదీ అరేబియా వంటి దేశాల వద్ద కూడా ఉంది.